إلى حب عمري

لو أن لى الاختيار لأخترتك

لو أنى مُسير لارتضيتك

ولو أن لى كلمة هى آخر عمرى لكانت أحبك

ولو أن لى من الأمر شيئا لكان طول الوقت مرافقتك

من أجلك كتبتها

ومن أجلك أعيدها مرة أخرى

تسمحيلى أعشقك ..... ؟

ضحكة عينيك الطيبة
صبرك صمودك قوتك
حبك حنانك رقتك

اسمحيلى أعشقك
وأعدى فوق بحر الأنين
و أمشى على أرضك سنين
ارتوى من نبع قلبك

اسمحيلى أعشقك
و أكون أمير
مالك ممالك قلبك الدافى الأمين

اسمحيلى أعشقك
وأكون معاكى ف سكتك
وأكون سند وأكون معين
وأكون شريك خطوة نجاح
وامسح أى ماضى يكون أليم

اسمحيلى أعشقك
وأكون ف وقت الفرح عيدك

وأكون روح تجرى فى وريدك

واكون ف وقت الحاجه ايدك

وأكون ربيعك
اسمحيلى أعشقك
وأكون أمانك من سهام غدر الزمن
وأكون ضياكي ف عتمة الليل الغميق
وأكون أمل لحظة رحيل

تسمحيلى أعشقك ..... ؟
وتكونى شمسى
وتكون عينيكى هيه الدليل
و تكونى نجمى
وسط الليالى السهرانين

اسمحيلى أعشقك
ما بين ايديكى

راسم طريقى وسكتى

شايف حياتى بتبتدى
ف اسمحيلى أعشقك

حروف اسمك

أربع حروف اسمك نغم
يهزوا القلب
والعين بتلمع
لما ينطقهم لسانى
أو يعدوا خاطر م الخيال

أربع حروف اسمك نغم
يأسروا القلب اللى تاه

من قبل ما يكون اللقا
قلبى اللى كان محتاج حنان
محتاج أمان
يا طوق نجاة

أربع حروف اسمك نغم

أسرح معاهم

و أسهر ليالى شغلانى

امتى اللقا

يا أغلى بسمه بتتنده

سامع ف قلبك صوت غنايا

ويا ترعيشة الأنامل والخجل

لما ينطقهم لسانى

يا أرق نور ضى ف طريق

شايف حروف اسمك أمل

يرسموا الحلم اللى جاى

وايدينا ويا بعض مشبكه

تحلف ما تتفارق ف يوم

احساسى بيك يا حبيبى

خلى الدنيا أحلى

و اللى جاى أحلى وأحلى

طول ما احنا سوا

عيد سعيد

كل عيد يمر علينا واحنا فى خير و سعادة ورضا

كل عيد يمر علينا وفريقنا العزيز بأحسن حال ومع بعض دايما

كل عيد يمر علينا والمدونين بخير

كل عيد يمر علينا واحنا أقرب وأقرب لكل حاجه كويسه وكل اللى نتمناه ويرضى ربنا

عيد سعيد علينا كلنا

Just a Quez

True Or False ?

Just a Point Of View :

***** Feeling Of Other's Trust Make Us Full Of Energy, Want To Do Our Best TO Get Results We Want Without Losing Our Patience With Time

*****One Of Life's Arts Is Facing The Problems , In Practical Life ….. When Facing A Problem, Dealing it & Finding Practical Solutions Is More Important Than Asking Who Cause This Problem

لم يكن الهروب يوما وسيله للعلاج قد يكون مسكن مؤقت لكنه لا يصلح مطلقا علاجا ******

خطوة صحيحة فى الوقت الخاطئ خطوة خاطئه ******

مع مرور الزمن قد تختلف نظرتنا للأشياء و حكمنا على الأمور ******

الحلم الغالى

زى النهارده من سنه
شفنا الهنا
شفنا السعاده كلها
شفنا الأيادى ويا بعض مربطين

الحلم غالى
وبالأمل ويا العمل
الحلم كان

حبة شباب زى القرود
و البنات فشر الأسود
هدوا سدود الرهبة هد
وقفوا وهزوا القلب هز
خلوا العيون بالدموع اغروروت
صحوا الأمل ف قلوب كتير
يبقى حرام لما الأمل فينا يموت
وازاى يموت
جايز نقف
جايز نقع
جايز نتوه
بس الأكيد إنا نكمل من جديد

و ف النهايه
كلمة أخيره
للى هنا و اللى هناك
اللى ما بينا و اللى بعيد عن المنال
اللمـــــــــــه أسمى
نخاف على بعضنا م الافتراق
الحلم واحد
دنيا جديده
دنيا نضيفه تلمنا

اتكتبت ف

11/9

ف ذكرى ضرب البرجين
ههههههههههههههههه

اسمحيلى أعشقك

تسمحيلى أعشقك ..... ؟

ضحكة عينيك الطيبة
صبرك صمودك قوتك
حبك حنانك رقتك

اسمحيلى أعشقك
وأعدى فوق بحر الأنين
و أمشى على أرضك سنين
ارتوى من نبع قلبك

اسمحيلى أعشقك
و أكون أمير
مالك ممالك قلبك الدافى الأمين

اسمحيلى أعشقك
وأكون معاكى ف سكتك
وأكون سند وأكون معين
وأكون شريك خطوة نجاح
وامسح أى ماضى يكون أليم

اسمحيلى أعشقك
وأكون ف وقت الفرح عيدك
وأكون روح تجرى فى وريدك
واكون ف وقت الحاجه ايدك
وأكون ربيعك

اسمحيلى أعشقك
وأكون أمانك من سهام غدر الزمن
وأكون ضياكي ف عتمة الليل الغميق
وأكون أمل لحظة رحيل

تسمحيلى أعشقك ..... ؟
وتكونى شمسى
وتكون عينيكى هيه الدليل
و تكونى نجمى
وسط الليالى السهرانين

اسمحيلى أعشقك
ما بين ايديكى
راسم طريقى وسكتى
شايف حياتى بتبتدى

ف اسمحيلى أعشقك

البعد ....صف تانى

رجعت تانى انور مدونتى اكيد
العب و اطنطط م تانى
وأرغى على قلبكم وأقول اللى عاوزه
حكى حريتشى كرامتشى

صيحات فرحه هيه هيه هيه هيه
شكرن شكرن شكرن
وصيحات استهجان وكلام من نوعيه يادى القرف
امشى اطلع بره ياد

و اللى عايز أنبوبة
يصحى من الغيبوبة
واللى واقف مستنى
معلش غصب عنى
فيه أزمة فى الأنابيب

أكيد الحمد لله على بداية مرحلة جديدة وخطوة كنت أحب أبدها من قبل كده بس ربك لما يأمر و يريد

نقطة أولى

ليه لما تحصل خطوة جديدة فى حياة الواحد مننا يبقى ده معناه ان اللى كان قبل كده بقى درجة تانيه أو صف تانى

عرفنا صاحب جديد يبقى احساس اللى كنا نعرفه بقى صف تانى
بقى عندنا أصحاب كتير يبقى احساس الأهل انهم بقوا صف تانى
اتجوز يبقى احساس الأهل صف تانى
ولما الام تخلف يبقى احساس العيل الاولانى صف تانى

ف رأيى ان الواحد لما يقدر يبدأ خطوة جديدة يبقى قدراته و امكانياته حصلها نوع من التطور و تقدر تستوعب الجديد ده جنب اللى موجود أساسا من غير ما تزحزحه و إلا ساعتها يبقى استبدال باستهبال مش تطور للأحسن

نقطة تانية

أكيد البعد عن الناس اللى بنحبهم و بنعزهم صعب باعتبار أننا شعب رومانسى عاطفى حالم حبتين يجيد الارتباط بالناس اللى بنحبهم بس البعد ده احيانا بيكون اختيار واحيانا بيكون اضطرار بس اللى أكيد انه لخير وحاجه كويسه مش غتاته ورزاله وهبل و استعباط

بشوف ان البعد علشان السبب ده بيكون احسن من البعد بفعل دنيا الملاهى و التلاهى اللى واخدانى و مش قادر أتواصل معاهم وساعتها يبقى البعد اللى برده غصب عنى بقى نوع م النسيان و التنفيض للناس دى و تبتدى تاخد م العلاقه دى لحد ما تنتهى بفعل عوامل التعرية

البعد من ناحية تانية بيبقى اختبار حقيقى للمشاعر و النفوس هيه كانت بفعل التواجد و الوجود ف المحيط ولا بسبب حب حقيقى ف الله

الموضوع ده بدأ معايا من زمان اوى اتولد ف الكويت و أعيش هناك لحد ما حرب الخليج تحصل و انزل اعيش ف مصر و فى الجامعه اقضى 5 سنين معظمهم فى الكليه اللى بعيدة عن بيتى اعرف ناس تانيه جديدة من كل مكان ف مصر ناكل و نشرب وننام و نتعلم و نلعب و نروح و نيجى مع بعض كانت بجد اوقات حلوة ثم ... الرحيل

ودلوقتى الحمد لله بشتغل دنيا جديدة وناس جديدة و أكاد أكون متأكد أنه هيجى وقت و اسألك الرحيل علشان مرحلة جديدة تبتدى

وتبدى مرحلة جديدة و معاها تبتدى تعرف مين اللى كانوا أصحاب بجد ولسه على اتصال و مين اللى خلاص فينيتوا
بنفرح اوى لما تلاقى تليفون فى عيد او مناسبة حلوة او حد يعزمك علشان تحضر مناسبة حلوة و الأجمل انك تقدر تلبى دعوته و يلاقيك عنده وقتها ( حاجه تفشخر صحيح )

بس المهم اننا نوظف كل اللى بيحصل بطريقه ايجابية أحول السلبى فيه لحاجه كويسه
بدل ما أبص عليها بطريقة سلبية وأحول الخير اللى فيه لحاجه زفت

زتونة الموضوع مش فى ايه اللى حصل
زتونة الموضوع فى طريقة تعاملك مع اللى حصل

عقبال عندك يا ام فارووووووق

لأ لأ
مش دى

أيون هيه دى

يا فضحيتى

يا خرااااااااااابى

أنا اشتغلت
طيب تصدقوها دى

اه و الله اشتغلت
و ربنا اشتغلت


ترا ترا تا ترا ترا تا تيت تيت تيت تيت بيب بيب بيب بيب
عيب يا وسطى اثبت شويه
انت عمال ترقص كده ليه
عادى يعنى
شئ متقوقع

عقبال عندك يا ام فارووووووووق
لولولولولولولولولولولولوىىىىىىىىىىىى
سمع هس

ومن هنا

احب اوجه انذار شديد اللهجه لسامح فهمى
الحق نفسك و خاف من دلوقتى على كرسى الوزارة
انا بقول من دلوقتى اهوه علشان محدش يقولى انى مقلتش

الحمد لله

القدر و العمل

من ترك مسألة الناس
وإراقة ماء الوجه أمامهم
وعلق رجاءه بالله دون سواه
عوضه الله حرية القلب
وعزة النفس
والاستغناء عن الخلق
*****************
من ترك الاعتراض على قدر الله
فسلم لربه جميع أمره
رزقه الله الرضا واليقين
*****************
الجملتين دووول لقيتهم عندى على الميل
الجميل فيهم انهم ف الجووون أوى معايا
عارف لما تشوف حاجه و تستكنيص منها أوى
اهم دوول كده معايا
يمكن كانت عندى الفكره دى من زمان
بس صياغتهم بالطريقه دى كانت المشكله معايا
و اخيرا لقيت الصياغه اللى ممكن تعبر عن اللى فى دماغى

اعتمادى على الناس كان بيجى دايما معايا الأوبشن الأخير
يمكن من واقع التجارب العبيطه اللى مريت بيها
او ثقافه الناس نفسهم
و اللى اعتقد ان كتير منهم بيفضل سياسه هات و متديش

اللى بيعلمك و يربيك
بيحبك اوى لما تضحك على حد
ولما تنصب عليه ويحس انك واد مخربش
كده يبقى انت واد مفيش زيك
انما لو بتدى الناس ومش مستنى حاجه
يبقى انت طيب
و الطيب ف الزمن ده بيقول عليه عبيط

اللى بيعتمد على الناس
عمرك ما تلاقيه متوقع النتيجه
ودايما دايما عايش توتر لحد ما العمل يتنجز
وحتى لو اتنجز يبقى قلوق ومش مصدق

انما اللى متوكل على ربنا وسايبها كلها لله
وعارف ان اللى هيحصل مهما حصل فهوه قدر ربنا و راضى بيه مهما كان
فتلاقيه مرتاح و مطمئن

يمكن بحاول اعمل ده
انى اعمل اللى عليا وابقى راضى عن أدائى
و اسيب النتيجه امتى و فين و ازاى على ربنا

الجملتين كمان بيكملوا بعض
و مرتبطين مع بعض فى جزئيه الرضا بقدر الله
بجد الرضا بقدر الله بيرزق نوع من الرضا و اليقين والإطمئنان
مش عادى انك تلاقيه عند حد
بيعمل نوع من الرضا و السعادة

حاجه كمان احب اقولها
ان عمره الرضا بالقضاء و القدر ما كان معناه التواكل و عدم العمل
ممكن اعمل اللى عليا و النتيجه تتأخر ف هيكون امتحان عن الرضا
و ممكن علشان لسه عندى اللى مقدمتوش و عندى اللى اكبر و اكتر م اللى عملته ولازم اعمله
و ممكن النتيجه اللى مستنيها يجى اللى احسن منها قدام شوية
حاجات كتير و احتمالات كتير مش بتاعتى
انا كل اللى عليا العمل و النتيجه دى بتاعت ربنا
امتى و ازاى و فين بتاعت ربنا

الكلام ده اخاف انه يودى الناس اللى تقرأه فى حته الواد المنشى
اللى كل ما حد يكلمه يقوله و انا اعمل ايه ما انا بعمل اللى عليا
الايمان بقدر الله لايعنى الاستسلام
لو النتيجه اتأخرت امون بنزين اكتر
و اتحدى نفسى اكتر
واعمل اكتر واكتر
قدرات البشر ملهاش حدود

كمان التحدى ده و الاصرار ميخلنيش اعيش تحت ضغط او نرفزه
او انى اغير نظرتى للناس و للدنيا
لكى تزداد سواد

بحب اخد الحاجه من آخرها
انا عايز أوصل للنتيجه دى و علشان أوصل لها مطلوب كذا و كذا لازم أعمله
و علشان اعمل كذا وكذا اللى مطلوبين محتاج مهارات كذا و كذا
ومحتاج أتعلم كذا وكذا
و يبيقى المشوار اترسم وكل اللى عليا إنى أبدأ أول خطوه
وبرده النتيجه امتى و فين و ازاى بتاعت ربنا
الطريقه دى اتعلمتها من حل مسائل الرياضه و الهندسه

بجد
من ترك الاعتراض على قدر الله
فسلم لربه جميع أمره
رزقه الله الرضا واليقين

وأخيرا
بنقرأ كلام يعجبنا ونقول عليه الله
فرجاءا
يتحول الكلام اللى عجبنا لتنفيذ على الواقع علشان يبقى له قيمه
وإلا هيفضل طول عمره كلام نقول عليه الله

نظرة

تعويذه

تعويذه
****
***********
تعودت ان أحيا ف سكون
أن أحيا ف سكوت
أخذت من لغة العيون لغتى
ومن همس الحديث كلامى
أخذت من صفاء النفس ألوانى
ورسمت بأرق الألوان لوحاتى
عزفت بالحب ألحانى
وسطرت منه الأنشوده
سافرت ف البحر سفنى
و أقلت عمرى وسنينى
صارعت الريح شراعاتى
ولا زلت أصارع
أشعر ب حنين للماضى
يأخذنى م الزمن الحاضر
أشعر ب حنين للماضى
يأسرنى بعيدا ف عالم حالم
ف املكينى وأسرينى
كونى انتى الماضى و الحاضر
كونى مصباحى انتى و مرآتى
كونى صمتى و كلامى
كونى لوحاتى
كونى عزفى و ألحانى
كونى دليلى
لايام أحاط بها الغموض
كونى انتى
ف املكينى و أسرينى

فوكيره مج مج مجنونه

انااااااااااااااا جيت و رجعت تانى
فتحت الدكانه و رشيت ميه و مستنى الزباين
يا فتاح يا عليم يا رزاق يا كريم

اول واحد قال الجمله اللى فاتت عبقرى
تجميعه مذهلة لأربع أسماء من أسماء الله الحسنى

الكوووووووووووووره مج مج مجنونه
مجنونه مجنونه مجنونه

الفريق اللى عايز ياخد بطوله
يجرى يعمل فترة اعداد فى احسن مكان ف العالم
و كل واحد على حسب امكانياته و الفلوس الى معاه
و اللى مش معاه ميلزموش

الزمالك هيجرى على فرنسا و اللعيبة هتشوف الريفيرا
و الاهلى اكيد رايح البرتغال علشان جوزيه يشوف ولاده برده
و دواليك دواليك

طيب و انت هتروح فين ؟
طيب الموسم اللى فات روحت فين ؟
اكيد اكيد كلنا عارفين احنا كنا فين

طيب علشان تاخد بطوله و تبقى انسان انسان
اعتقد محتاجين فتره اعداد
للاسف مكنش فيه اعداد كويس يناسب اللى جاى
و لا يناسب الطموح
يبقى هتنزل الملعب و تأدى على قد ما تقدر
و تعمل وانت فى وسط الموسم اعدادك
حبه حبه هتزيد
بس متستعجلش
هتلاعب فرقه و تأدى كويس هتتغر و تقول انا عديت
البطوله دى بتاعتى انا
و انت يا حسره لسه نفسك قصير بس دعاء الوالدين هوه اللى عامل شغل

بنحلم و من حقنا نحلم
و يبقى عندنا امل و طموح و من حقنا ده
بس محتاجين نحسبها صح نشوف امكانياتنا و نطورها
واللى اهم من ده الصبر

عايزين نحلم النهارده و نشوف النتيجه بكره
طب ازاى ............؟!!!!
خليك عاقل يا عم الحاج

الكوتش اللى قاعد على الدكه بره لازم يبقى عنده صبر
النهارده طلعنا نلعب فى الممتاز و مهبطناش تانى ده مكسب
الموسم اللى بعده حققنا مركز افضل
و دواليك دواليك
ممكن ينزل المستوى و نمر بكبوه
امر طبيعى و عادى
بس ساعتها مش اقدم استقالتى
وحتى لو مفيش نتايج امااااااااال انت لزمتك ايه
افتكر كلمه زدنى لو الفريق كله وحش يبقى العيب من الكوتش


هاعترف انى انا مستحقش و انى زباله
ارتحتوا كده
طيب و بعدين
هنزوى فى جنب و اقعد اعيط و ابكى على حالى
محدش هيعبر اهلى
هشوف الدنيا سوده و مفيش امل
اول واحد هياخد على دماغه هوه انا
ومحدش حاسس بيا و محدش عارف حالى
و اجرى اعمل زى الأفلام العربى البايخه
و البطل يقع فى براثن الادمان و الانحراف
وهنا قد جنت على نفسها سعاد

طيب لو كان عندى امل و تفاؤل
بس المهم برده يكون معقول
مابقاش صعلوك و اقول انا بكره بكره هابقى ملك
هاساعد نفسى ساعتها قبل ما حد يساعدنى
هاجبر غيرى انه يساعدنى لو احتجت المساعده منه


و دلوقتى اقدر اشيل النضاره
واقوووووووووووول
فيروووووووز بالتوت ع الحزن هندوس

علمتنى الحياة

علمتنى الحياة
أن اختيار الأحسن لم يكن دوما هو سبيل النجاح لاحتمال كونه ليس الأنسب
علمتنى الحياة
أن اصرارى على اختيار الأحسن دائما دون أن يكون الأنسب وادراكى لهذا نوع من أنانية و طمع البشر
علمتنى الحياة
أن اعترافى بكونى لا استحق الأحسن يجعل من هذا دافع لتحسين امكانياتى و تحسين نفسى لاستحق الأحسن و الأفضل
علمتنى الحياة
أن اعترافى بكونى لا استحق الأحسن حاليا لا يتعارض مع طموحى مستقبلا
علمتنى الحياة
أن السخرية من تصرفات الناس وارائهم لم تكن يوما طريقة لتصحيحها ان كنت أراها خطأ لكنها دليلا على قوة الشخصية الزائقة
علمتنى الحياة
أن احترامى للآخر هو احترام لنفسى أولا
علمتنى الحياة
أن أفعل ما أقتنع و أؤمن به لأننى من سيُحاسب عليه
علمتنى الحياة
أن ما أرغب القيام به من قول و عمل مرتبط بزمن لا يجوز ان أفعله قبل هذا الزمن ( قبل أوانه يعنى ) كما لا يجوز أن أفعله بعد هذا الزمن ( بعد العيد ميتفتش كحك ) مالوش لازمة يعنى
علمتنى الحياة
أن احب ما أفعل حتى أفعل ما أحب
علمتنى الحياة
أن أرضى بما يحدث لأنه قدر الله

بلا عنوان

ابكى على حالى
واقول الصبر موالى
واغنى و اقول اه يانى
أغنى الصبر بالمواوويل
واقول للوش ليه تضحك
والقلب جوه حزين
مكتوب عليه الويل
عايش وحيد
عاشق لصمتى
ياترى ممكن الاقى نفسى سعيد ...؟
عندى امل ف بكره جميل
بإذنه يتغير المكتوب
بس مين أنا ؟
لا كنت يوم ملاك
ولا هأبقى يوم
لأنى واحد م البشر

التاج علينا حق

التاج علينا حق وكاس على الكل داير
ميرسى للبلوجاوية هوندا على التاج بس اكيد هيترد يوم امال ايه ده واجب

أحب شخص لقلبك فى الدنيا
بصراحة كتير - يساعى من الحبايب الف

انسان مستعدى تضحى بحياتك - ركز فى كلمة حياتك - عشانه

كبيرة اوى كلمة التضحية لأنها هتبقى بمال و انا محلتيش او النفس ودى تبقى فى الحرب واحنا مش فى حرب لو خلاناها تبقى البذل فاقدر ساعتها اجاوب و اقول الناس الحلوة اللى فوق

انسان كرهته لدرجة الجنون وتمنيت لو تمسك سكينة وتنقض عليه وتغرزها فى قلبه وتقف تبص لجثته وتشفى غليل قلبك

ليه بس تفكرونى - بصراحة هم اتنين التانى فيهم الواد اللى سرق الموبايل الان 73 بس ده غليلى منهم قل شوية علشان الموبايل رجع تانى لحضن الوطن بس برده اول ما هاشوفه هاديلة واحد على القفا فى التمام - التانى بقى حسبى الله و نعم الوكيل فيه لأ و بيقولوا دكتووور هوه ممكن يبقى دك طووور انما دكتوور دى صعبة شوية

ما هو اسم اجمل كتاب كتاب بشر قرأته ومحتفظ به حتى الآن ؟

+

اسم كتاب كتبه بشر برضه أنت متعلق بيه وبتقرأه كل فتره

للأسف مش غاوى قرايه بس ليا فيها على خفيف

اهم جهاز منزلى انت متعلق بيه او بتستخدمه كتير؟

البى سى بتاعى

مكان تحس بالراحة عندما تدخله؟

طبعا بيت ربنا من غير كلام - اسكندرية

شىء تحس بالراحة النفسية عندما تنظر اليه؟

وانا فى اسكندرية على الكورنيش بالليل البحر و السماء

مكان تحس فيه بالحنين الى شىء لا تدرى ماهو و ذكريات جارفة الى شىء؟

كوبرى استانلى باسكندرية

اجمل مدينة زرتها داخل مصر ؟

اسكندرية

أجمل مكان طبيعي رأيته داخل مصر ؟

برده اسكندرية

شخصية كارتونية بتحبها

باباى بتاع السبانخ

نوع هاتفك المحمول؟

ليه بس الاحراج ده ..... 7610

سرعة بروسيسور جهازك؟

2.1

حجم ذاكرة –هارد- جهازك؟

80 على قدى

المساحة التى تشغلها المواد الاسلامية على جهازك؟

بصراحة محسبتهاش و مش هادخل احسبها دلوقتى

أهم هدف انت واضعه لحياتك الآن؟

أحاول ابقى انسان كويس

وليس للانسان الا ما سعى

مواصفات فتاة الأحلام بالنسبة لك؟

هوه السؤال كان جايلى فتى بس يلا زى بعضه نخليه فتاة

المواصفات بقى ........... بنت مصرية

و من هنا احب اقول العصيدة اللى مش عايزه تكمل

****************************

تسمحيلى أعشقك ؟
دى أحلى لحظه لما أشوفك تضحكى
بسمة عينيك حلم لحياتى
ضحكة عينيك الطيبة
صبرك صمودك قوتك
حبك حنانك رقتك

اسمحيلى أعشقك
وأعدى فوق بحر الحنين
أمشى على أرضك سنين
وارتوى من نبع حبك

...

..

.

صف ما يأتى

شعورك لما بتسمع كلمة مصر ؟

نفس الشعور لما بسمع رصيف نمرة خمسة بتاعت عمرو دياب

لو مصر هيه اهلها و الناس الطيبين اللى عايشين فيها طبعا شعور بالحب

ولو افتكرت الناس اللى زى الفل هيبقى شعور ابن ستين فله

ولو كنت بره مصر و حد غريب بيتكلم عنها هيبقى شعور بالحب و الفخر كمان

شعورك لما بتسمع كلام عن اليهود؟

نفس الشعور اللى بيجيلى لما افتكر اخينا الأولانى اللى فوق مش اللى سرق الموبايل لأ التانى

شعورك لما بتشوف ظابط شرطة؟

عادى يعنى ايه اللى هيفرق اهوه بنى ادم برده انما لو من اخوانا اللى شايفين نفسهم يبقى ..... عيب يا لسانى ادخل جوه يلا

شعورك لما بتشوف الكناس العجوز فى الطريق؟

لسان حالى بيقول : ربنا يديك الصحة

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟

راجل زى الفل

احساس يراودك فى اشارة مرور مغلقة بسبب مسئول كبير؟

محصلش الموقف ده قبل كده فطبعا معرفش ممكن شعورى يكون ايه

تمرر التاج لمين ؟؟

من موقفى هذا احب امرر التاج ل

مامادو و برايت بمناسبة التجديدات فى البلوجات بتاعتهم

سكايار وروميو ... وربنا نفسى ما تجاوب على التاج

عمنا الخيط الرفيع و عمنا النورانى و عمنا البوتانست

اينوووو ..... اللى بيحبها موووت

الدنيا كلها شبابيك

مش عارف اوصف الشعور اللى كنت فيه النهارده وانا بتفرج على التلفزيون
نبتدى من شبابيك
خلاص يا عم بقينا ف القرن مش عارف كام و عشرين ....... يعنى ايه ؟!!!
زمان كانت الرجاله بتعاكس ..... اللى شايف نفسه و حاسس انه فلتة زمانه كان بيعاكس
انما دلوقتى الرجاله بقت بتتعاكس .... اه و الله ده اللى كانوا بيتكلموا فيه
بنت من أسرة تحرير مجلة احنا اسمها سندس نزلت تعمل تحقيق حول المعاكسة
اتصدمت من ان شاب بيقولها اننا احنا اللى بنتعاكس دلوقتى
هوب قلبت التحقيق و بدات تتطأس على الموضوع ده لقيته موجود فعلا فى اوساط الشباب
طبعا مش عايز اقول انى قاعد مستكنيص على الآخر
يا سلام يعنى على كده بقى نقعد فى البيت و مش نخرج بالليل لوحدنا
و لو حد عاكسنا واحنا ماشين فى الشارع نقوله يا ســــم
بكره نعيش و نشوف و اللى يعيش يشوف اكتر
***************
بتفرج على برنامج 90 دقيقة وهوه بناقش قضية توريد شغالات للسعودية
اخيرا لقينا حاجه ننافس فيها وهوه توريد شغالات
هنافس الفلبين و سيريلانكا يدوبك كده على قدنا
من بعد الدكاتره و الموظفين و من بعد ما كنا بنساعد الناس على بناء حضارة لبلادهم
جه الدور علينا اننا نوفرلهم الدلع و الرفاهيه
طبعا ما احنا لازم نقوم برسالتنا على اكمل وجه
امال ايه مش دى مصر ام الدنيا
الله يرحمك يا رجولة
عجبنى ساعتها لما أ/ مصطفى بكرى رد وقال لو ده حصل يبقى معتش رجاله فى مصر
*******************
شوية وقلبت اتفرج على العاشرة مساءا
الضيف ......... د/ احمد بهجت
السبب .............. احتفالا برجوعه من امريكا بعد نجاح عملية زرع القلب
انسان عادى جدا بيتكلم عادى تحس انه ممكن يكون جارك او قريبك
متشعرش وانت بتشوفه انك بتكلم واحد من اللى نفختهم الفلوس
ولا انه عنده ثروه تبلغ عدة مليارات
فكر اقتصادى محترم قلما وجد فى مصر
ازاى اعمل حاجه مفيدة وبرده هتجيب فلوس
تواضع .. احترام لنفسه ... ولغيره
ثقة بنفسه لا تصل للغرور .... مقتنع بما يقول و متقبل ان يكون على خطأ
ثقة بالله ... كلامه لا يخلو من الحمد و الثناء و الاعتراف بفضل الله
تشعر من كلامة بانسان لديه من الرحمة ما يكفى ليظل انسان
طموح وامل فى غد مشرق نتيجة عمل و جهد مش دلع و انتخه
لسه فيه امل
بجد
شكرا أ / منى الشاذلى
شكرا د/ أحمد بهجت

Team

Togther
Every one
Achieve
More

لما اتعلمنا شغل تنمية بشرية ...... اتعلمنا معنى كلمة تيم
بس لما تتعلم حاجه ........ اهوه كله كلام نظرى
و لما تطبق و تلاقى ده ....... بتبقى حاجه تانيه
بتشوف و تكتسب مهارات و خبرات من الاحتكاك
بتتعلم من تجربتك و تجارب تانيه انت معشتهاش بس شوفتها
ان ربنا يرزقك بتيم زى اللى اعرفه ... يبقى الحمد لله

كل واحد فى التيم شايف نفسه حاجه بسيطه و صغيره
و بقيت التيم حاجه كبيره اوى
من باب التواضع شايف نفسه بسيط
ومن فرحته بالتيم شايف انهم حاجه جامده اوى و هم فعلا كده

شايف انه بيتعلم منهم وبيتأثر بيهم .. ومش ملاحظ انه كمان بيعلمهم و بياثر فيهم
لما كل واحد فيهم عايز يشوف بقيت التيم احسن و احسن و اعلى و اعلى
لما كل واحد منهم بيعمل احلى و اجمل نوع من المسانده لبقيت التيم
لما كل واحد فيهم بينسى مشكلته او اللى مزعله علشان يساعد حد تانى من التيم
لما البسمه بتترسم اول ما حد منهم يشوف التانى .... اه و الله ده اللى بيحصل

يبقى ده احلى تيم

THANKS OUR TEAM

عالم موبايلات

الفتره دى مش قادر اتكلم كتير و مش قادر اعبر عن اللى فيا
فاعذرونى بقى للاختصار ..... وكمان اهوه تغيير
انا نزلت الكومبو بوست و المينى بوست و قريبا النانوبوست

البنى ادم زى الموبايل
رصيده ........ مشاعره وقدرته على العطاء وعلاقته بالناس ... بس ايه فايده الرصيد و هوه فاصل شحن

و عجبى ...!!!

الكبير ... كبير
و النص نص ... نص نص
والصغير ... منعرفوش

يالى ابتليتى

يالى ابتليتى طولى بالك
ده انا ابتليت و بلوتى طالت

وجهة نظر

( 1 )
الــغبى هــو من لا يتعلم من أخطائه
الـــذكى هــو من يتعلم من أخطائه
الأذكى هــو من يتعلم من أخطاء الآخرين

وجهة نظر قرأتها من زمان

**********

( 2 )

حياتنا ما هيه الا مجموعه من العلاقات الانسانيه

بعضها لا تستطيع أن ترفضه و عليك أن تتقبله

و بعضها تختاره بنفسك و تقرره

علاقتنا بأسرتنا ............علاقه انسانيه

علاقتنا بأصدقائنا ..........علاقه انسانيه

علاقتنا بأحبابنا ..............علاقه انسانيه

كلها مجموعه من العلاقات الانسانيه بين طرفين

تعتمد فيها على قدر ما تعطى و ما تبذل من عطاء

على مقدار الايثار

على مقدار ما تمتلكه من حب تستطيع أن تمنحه

لا تطلب من الطرف الثانى أن يمنحك أكثر مما اعطيته أنت

و ان أعطاك الكثير فحاول أن تعطيه مثلما أعطاك

و ان أعطيته أكثر مما أعطاك فلا تحزن

فـــإن الله موجود

*********

( 3 )

من الرقى انك تكون صاحب فكره يسعد بها الناس ولا تكن بينهم لتفرح معهم و لكنك تشعر بمدى سعادتهم

تعلم أن تمنح قبل أن تطلب ..... فعندما تمنح من يستحق ستأخذ أكثر مما تريد

كل ما لا يمس كرامتك صغيره ... فترفع عن الصغائر تعلو فى نظر الناس

أصعب ما قد يخسره الانسان نفسه .. فحافظ عليها

مرايتى

***********************************************************

مرايتى

هوه مفيش مرايه هنا .... ؟؟
جمله عاديه و بنسمعها كتير و بتعدى زى أى حاجه بتعدى
بس المره دى معدتش عادى
لقيتنى بسأل نفسى .....
هوه الواحد محتاج مرايه علشان يشوف نفسه ؟!!
ومرايتنا بقى ممكن تبقى مين ؟
احنا ولا حد تانى .. ؟
و لو لقيت مرايتك تحب تشوف فيها إيه ؟