Sunday, July 22, 2007

القدر و العمل


من ترك مسألة الناس
وإراقة ماء الوجه أمامهم
وعلق رجاءه بالله دون سواه
عوضه الله حرية القلب
وعزة النفس
والاستغناء عن الخلق
*****************
من ترك الاعتراض على قدر الله
فسلم لربه جميع أمره
رزقه الله الرضا واليقين
*****************
الجملتين دووول لقيتهم عندى على الميل
الجميل فيهم انهم ف الجووون أوى معايا
عارف لما تشوف حاجه و تستكنيص منها أوى
اهم دوول كده معايا
يمكن كانت عندى الفكره دى من زمان
بس صياغتهم بالطريقه دى كانت المشكله معايا
و اخيرا لقيت الصياغه اللى ممكن تعبر عن اللى فى دماغى

اعتمادى على الناس كان بيجى دايما معايا الأوبشن الأخير
يمكن من واقع التجارب العبيطه اللى مريت بيها
او ثقافه الناس نفسهم
و اللى اعتقد ان كتير منهم بيفضل سياسه هات و متديش

اللى بيعلمك و يربيك
بيحبك اوى لما تضحك على حد
ولما تنصب عليه ويحس انك واد مخربش
كده يبقى انت واد مفيش زيك
انما لو بتدى الناس ومش مستنى حاجه
يبقى انت طيب
و الطيب ف الزمن ده بيقول عليه عبيط

اللى بيعتمد على الناس
عمرك ما تلاقيه متوقع النتيجه
ودايما دايما عايش توتر لحد ما العمل يتنجز
وحتى لو اتنجز يبقى قلوق ومش مصدق

انما اللى متوكل على ربنا وسايبها كلها لله
وعارف ان اللى هيحصل مهما حصل فهوه قدر ربنا و راضى بيه مهما كان
فتلاقيه مرتاح و مطمئن

يمكن بحاول اعمل ده
انى اعمل اللى عليا وابقى راضى عن أدائى
و اسيب النتيجه امتى و فين و ازاى على ربنا

الجملتين كمان بيكملوا بعض
و مرتبطين مع بعض فى جزئيه الرضا بقدر الله
بجد الرضا بقدر الله بيرزق نوع من الرضا و اليقين والإطمئنان
مش عادى انك تلاقيه عند حد
بيعمل نوع من الرضا و السعادة

حاجه كمان احب اقولها
ان عمره الرضا بالقضاء و القدر ما كان معناه التواكل و عدم العمل
ممكن اعمل اللى عليا و النتيجه تتأخر ف هيكون امتحان عن الرضا
و ممكن علشان لسه عندى اللى مقدمتوش و عندى اللى اكبر و اكتر م اللى عملته ولازم اعمله
و ممكن النتيجه اللى مستنيها يجى اللى احسن منها قدام شوية
حاجات كتير و احتمالات كتير مش بتاعتى
انا كل اللى عليا العمل و النتيجه دى بتاعت ربنا
امتى و ازاى و فين بتاعت ربنا

الكلام ده اخاف انه يودى الناس اللى تقرأه فى حته الواد المنشى
اللى كل ما حد يكلمه يقوله و انا اعمل ايه ما انا بعمل اللى عليا
الايمان بقدر الله لايعنى الاستسلام
لو النتيجه اتأخرت امون بنزين اكتر
و اتحدى نفسى اكتر
واعمل اكتر واكتر
قدرات البشر ملهاش حدود

كمان التحدى ده و الاصرار ميخلنيش اعيش تحت ضغط او نرفزه
او انى اغير نظرتى للناس و للدنيا
لكى تزداد سواد

بحب اخد الحاجه من آخرها
انا عايز أوصل للنتيجه دى و علشان أوصل لها مطلوب كذا و كذا لازم أعمله
و علشان اعمل كذا وكذا اللى مطلوبين محتاج مهارات كذا و كذا
ومحتاج أتعلم كذا وكذا
و يبيقى المشوار اترسم وكل اللى عليا إنى أبدأ أول خطوه
وبرده النتيجه امتى و فين و ازاى بتاعت ربنا
الطريقه دى اتعلمتها من حل مسائل الرياضه و الهندسه

بجد
من ترك الاعتراض على قدر الله
فسلم لربه جميع أمره
رزقه الله الرضا واليقين

وأخيرا
بنقرأ كلام يعجبنا ونقول عليه الله
فرجاءا
يتحول الكلام اللى عجبنا لتنفيذ على الواقع علشان يبقى له قيمه
وإلا هيفضل طول عمره كلام نقول عليه الله

26 comments:

HaMbAcAWeY said...

awlan ana 3ayza a7ayek 3ala el 7amasa we el tafa2ol elle 7aset behom men ben el sotor sada2ny she2 gamel enk tesamem teb2a 7aga fe balade etba3et feha kol haga 7ata a7lam el shabab
3omoman nase7ty lek ennk tefdal mota7ames le2anak kodwa le nas keter we menhom ana le2any nefsy akon mohandassa zay 7adretak
we 3ayza a2olak mateb2ash 2asy 3ala nafsak el 3eb mesh fek el 3eb fe el nezam kolloh we fe sha3b saket 3ala 7aloh

ثورة said...

أدينا بنعلق أهو .. عشان متقولوش مش بنكمنت عندكو دي

أرفع القبعه

والجملتين دول قريتهم قبل كده وعجبوني جدا برضو

فيه جوا حاجات جامده .. طلعوا انتو بس
؛)

سلااااالم

Halawa said...

أثابكم الله
حلو الكلام

بتهيألي ده يتفق مع الرأي بتاع
انك مش ضروري تقول كل اللي جواك
اللي هو البوستين اللي فاتوا بتوعي
ربنا أعلم يا أخي
وأحسن مني ومنك
ومن اللي خلفونا

لو كان شكوى أو فضفضة أو سر
أو حتى لاسمح الله شحتفة

مش كده ولا إيه؟
لو أنا مش بتاع الأنا
يبقى هبقى بتاع حد تاني
أو حد تاني يشاركني فيا ازاي
لو لسه مش فاهمني
يبقى أدور على روحي
بعد كده أنشغل بالناس

نتفق دائما
نختلف في الألفاظ والتطبيق
وكمان الأحكااااااااام
مش عيببببببب
ولا حرااااام

Halawa said...

عجبتني الرسالة الأخيرة
ان الدنيا شغل

بس في حتة مبحبهاش
في الهندسة والرياضة
هقول لسيادتك حاجة
خدني على قد عقلي
الحساب والرياضة
ملهمش حل جامدين وبيوصلوا دايما
لأنك عارف البداية والنهاية

بس للأسف
وأنا واحد كنت شاطر في الرياضة
بس بكرهها
لأنها بدون احساس
قوالب جامدة حط كذه جنب كذه يطلع كذه
وبناء على كذه تكون الأستذة
قشطة جدنننننن

بس شوف بقى اللغات مثلا
مزيكاااا احساس
اصوات مخارج ألفاظ تعبير رقص ودلع
ودنيا شابة وانت الجدع
ماتيجي نرقص

الاتنين بيوصلوا على فكرة
بس متعة الرحلة
في الهشتكة في الهات والخد

وشوبش يادنياا

سلااااااامون القماش

enoOo said...

الله الله يا مولانا
مين ده اللى بيتكلم ؟

اهى دى بقى عندك حق فيها
على فكرة يا مغلوب البوستين دول كانوا ليك

http://ba7ebahamoot.blogspot.com/2007/05/blog-post_19.html

http://ba7ebahamoot.blogspot.com/2007/05/blog-post_11.html

وفى النهاية

من ترك الاعتراض على قدر الله
فسلم لربه جميع أمره
رزقه الله الرضا واليقين


السلام عليكم

3ashe2elro7 said...

همبكاوى

يا نهار ابيض
قدوة حته واحده
ايه الكلام الكبير ده بس

يمكن الحماسه و التفاؤل ده اكتر بنزين ينفع ف الزمن ده مع حبه اصرار و عند مع النفس و شويه تصميم مع حبتين رزاله كده برده مع النقس انى هاعمل كذا لما اقتنع بيه

مشكلتنا اللى ممكن اشوف اننا بنلاقيها هوه الورث اللى قبلنا سابووه
حاجه كده محتاج تنظيف و تلميع ويمكن هوه ده دورنا و ممكن نلشوف نتيجه ده و ممكن مش نشوفه

دراسه الهندسه كمان لذيذه اوى يلا شد حيلك والكليه مستنياك

3ashe2elro7 said...

ثورة ف عيد الثورة
ايه الهنا اللى انا فيه ده

مشكلتى ان من يوم ما عرفتكم و انا كل اللى جوه بيطلع لما بقيت مفضوح و الناس لسه مش مقتنعه انى بعمل كده
امال لو شوفتوا قديمه كنت عملتوا ايه

شرفت يا فندم

وبلاش تشمتوا فينا الأعادى بالحرب اللى انتوا عملينها ياولاد المنطقه الواحده

3ashe2elro7 said...

حلاوة

بتقول على الكلام حلو
رقصنى يا معلم ظبطنى يا معلم
يا الفرحه مش سايعانى
ملقيش مقاس اكس لارج عندك
ههههههههههه

عايز اوضح حاجه صغيره بس
اعتمادى على الناس اللى اقصده بيبقى ف الشغل و المصلحه يعنى بلغتك كده
PRACTICAL

فكرة انى مش فاهمنى او مش لاقينى دى صعبه حبتين و بالذات مع حد زيك يا صاحبى
ممكن اكون حودت شويه و لو معرفتيش ارجع تانى لطريقى اشوف حد م اللى ممكن يساعدنى و ده برده براحتك و مزاجك و الكل موجود
ونقى و اختار يا عبد الستار

3ashe2elro7 said...

حلاوة برده

اتعلمتها م الرياضه اه بس حطيت معاها لمستى ف التطبيق

مستش احط فيها شويتين احساس و اضيفلها حبة روح بعد ما تتسبك

امال عاشق الروح ايه يا استاذ

و على سيرة المتعه

متعه الحاجه اللى بتتعمل فى السكه و المشوار اللى بنمشيها
اننا نحب و نستمتع بكل حاجه ف السكه

3ashe2elro7 said...

اينوووووو

شرم و اللى بيروحوا شرم
و ببلاش و من غير فلوس
يعنى الفور سيزون و ادبها

شكرا اوى على البوستين و زى ما تقول كده كنت حاسس

هههههه

شيخ سيد بيسلم عليك و بيقولك ابقى اتغطى

3ashe2elro7 said...

حلاوة

نسيت اقولك ماشى ياعم المايص
اتمايص براحتك
رقص و دلع و الدنيا هيه الشابه و انت الجدع

كائن نورانى said...

سلامون عليكوم

ازيك يا هندسة

اخباراتك

اخبارات مصر ايه؟

انا معاك بجد

انا كمان مش بحب اطلب حاجه من حد

مش علشان حاجه ولكن كل انسان يخدم نفسه الا اذا كانت حاجه خارجه عن ارادته

بالنوسبة بقى للبراجرافين

توحفه اوى

يمكن انا كنت محتاجه اسمع بؤين من دول


شكرن اوى بجد


وشكرن على المصيبة اللى بعتناها لك

شفت وصلنا مع التكنولوجيا لفين؟

الحمدلله

دعواتك يا فندم

سلاموتو

محض روح said...

ليك فاتره بتحاول تتكلم عن الناس ولغه الحوار الي مفروض تكون
البوست ده حلو اوي
عارف مشكلة ناس كتير انهم ديما بيستنو مساعده من الخارج
مش عارفين انهم لو مقدروش يسعدو نفسهم عمر ما حد هيقدر يسعدهم
وبالنسبه لموضع القدر انا كنت بحب رائ محمد عبده
ان الانسان حر في تصرفاته
واسبقيه علم الله مش هتكون باعث او مانع على فعل بيفعله

احنا ربنا خلقنا احرار واحنا الي حبسنا نفسنى

3ashe2elro7 said...

نورانى

اما عن اخبار مصر فالحمد لله هنجيب عربيه و نشتغل ع الخط قريب على الاقل نجيب مصاريف المشاوير
هههههههه

و فرحان طبعا جدا انهم جم ف الجووون معاك هيه جت معايا كده بقى زى اجوان ابو تريكه البركه

ههههههههههه

و مالها التكنولوجيا مش بتقول برده و شغاله بس و الله تكنولوجيا لذيذه

سلامووووووو عليكم

الخيط الرفيع said...

انا شخصيا بيستهويني الكلام في موضوع الرضا وانك تكون سعيد من جوا وراضي عن نفسك مهما حصل
مش بعبط لا بفهم عالي لظروفك وقدراتك ومعطياتك
زي ما حضرتك اتكلمت
ومن اجمد الافكار في البوست ان السلام النفسي اللي بترسم له طريق في كلامك
ساند علي التوكل ومعيه ربنا
بس خلاص
سلامات

ولقطة زن بقي

هنعمل ايه في الشنطه السنادي بقه ان شاء الله
الناس بدأت تصوم رجب وشعبان
والممثلين بيجهزوا للمسلسلات والسهرات
الكل اتحرك بطريقته
بس وخلاص كنت عيزة أقول كدا

3ashe2elro7 said...

محض الروح
بعد فترة غياب

هوه غعلا الموضوع ده شاغل ناس كتير الفتره دى يمكن علشان لسه خارجين لعوالم جديده كلنا

اتفق معاك فى الراى اللى قلتيه

يلا سلامووووووز

3ashe2elro7 said...

الخيط الرفيع

تمام تمام

ولقطة الزن

كلاكيت
اكشن تانى مرة

حاضر

ههههههه

HaMbAcAWeY said...

mayenfa3sh el kalam dah 7َales ya eng.3ashe2
ba2a teseb dr. halawa yeghlat fe el handassa
fen sharaf el mehna

Reemo said...

انت قلتها فى البوست
اهم حاجه انك تعمل اللى عليك وبعدين تتوكل على الله
الللجوء للبشر انا بحسه مذله ملهاش لازمهلان امرى بإيد اللى خالقنى مش بإيد حد تانى
عجبتنى بجد الجملتين دول
واعتقد انى انا كمان لما قريتهم حسيت انى لقيت صياغه لحاجه معينه بفكر فيها ومش عارفه اعبر عنها
ميرسى ليك
تحياتى

الأميرة ميرامار said...

من ترك الاعتراض على قدر الله
فسلم لربه جميع أمره
رزقه الله الرضا واليقين

للاسف الواحد بيبقي عارف الكلام ده وبينساه او مبيعملش بيه او يمكن بيحتاج حد يفكره بيه ويقولهوله
جزاكم الله خيرا

3ashe2elro7 said...

همبكاوى

ايه ده هوه غلط والله ما حد قالى خالص
بس اذا تكلم .................
مش هاكلمها بقى احسن اضرب
بس انتوا اكيد عارفين الباقى

3ashe2elro7 said...

ريمو

التوكل على الله مفيش احسن منه حاجه خالص
ساعات بننسى و نقع ونحود شويه بس بنرجع تانى و احنا واثقين و متأكدين

شرفتينى
ومبرووك البلوجايه الجديده

3ashe2elro7 said...

الأميرة ميرامار

صح
و صح الصح

بيتهيألى كمان احنا محظوظين اننا بنلاقى الناس دى

نورتى البلوجايه
تحياتى

david santos said...

A good and happy week for my friend

shreef said...

و الله يا ابني فعلا سبها على ربنا و هتلقيها بتفرج كدا من عنده ساعات الواحد بيقعد يرتبها و يحسبها و تيجي في الاخر اتفشكلت و يدوب حاجة بسيطة و تلاقي سكة جاتلك كدا من حيث لا تدري..فعلا انا اريد و انت تريد و الله يفعل ما يريد..بس ليا سؤال هو يعني ايه تستكنيص؟..سلام

3ashe2elro7 said...

شريف

تستكنيص يعنى تتبسط منها
او بمعنى تانى تتكيف منها
يعنى السعاده و البخدده كلها تبقى عندك

شرفتنى و اكيد معاك حق فى كلامك