Sunday, March 25, 2007

مرايتى


***********************************************************
مرايتى


هوه مفيش مرايه هنا .... ؟؟
جمله عاديه و بنسمعها كتير و بتعدى زى أى حاجه بتعدى
بس المره دى معدتش عادى
لقيتنى بسأل نفسى .....
هوه الواحد محتاج مرايه علشان يشوف نفسه ؟!!
ومرايتنا بقى ممكن تبقى مين ؟
احنا ولا حد تانى .. ؟
و لو لقيت مرايتك تحب تشوف فيها إيه ؟

19 comments:

SAKAyAR said...

حرام عليك كده بقى ... كنت امبارح وأنا مروح من عندك بفتكر مرايتي أيام ما كانت مكسورة من عند الراس ... وقلت الواحد كده بيشوف الحقيقة لإنه لو دقق ف المرايا مش هيشوف نفسه ... هيشوف الشخص اللي واقف من غير ما يقول هوه مين... فيقدر يحكم اللبس حلو ...الهيئة دي كويسة؟؟؟ لكن قلت كل واحد محتاج لمراية يشوف فيها نفسه ... لكن مين هيه مرايتي؟؟؟ وكان ردي ... اصحابي طبعا ... أشوف فيك توم وجيري

ثورة said...

المرايه عبارة عن لوح عاكس زائد عنين تشوف
واللووووووح ممكن يبقى أنا أو حد مقرب ليا
لكن العنين لازم تكون عنيا

وأحب أشوف الحقيقة
مجردة
بدون تجميل

إبراهيم said...

يوووووه السؤال ده بحره واسع قوي

بس انا طماع وعاوز أشوف حاجات كتير

أول حاجة عاوز أشوف حقيقة الكون وأشوف حقيقة الموت وحقيقة الوجود عاوز إيمان حقيقي بديني مش مجرد اسم اني مسلم

عاوز اشوف المسلمين كلهم ايد واحدة.. تهد وتقطع أي ايد تهينها أو تمس كرامة كلب ماشي على أرضها

نفسي أشوف أهل بلدي فرحانين.. حبين بعض ومستريحين.. نهد النظام الفاسد ونعمل نظام شريف

اشوف أمي سعيدة بولادها وبلدي سعيدة بشعبها

أشوف نفسي واحد ربنا بيحبه

سلام

shabfa2re said...

ان الله لا يغير ما بقوم حتى يغيروا ما بأنفسهم

3ashe2elro7 said...

سكايار
المرايات عند بعضها
اجبه كنت متوقعها و مستنيها
بطلع لسانى

ثوره
مبروك الخروج بكفاله
بس اعتقد ان الواحد مش بيشوف كل العيوب اللى فيه بنفسه والا مكنش هيحتاج لمرايه م الاول

ابراهيم
الحاجات دى كلها بنتمناها بس اللى كنت اقصده من سؤالى كان بخصوص نفسك انت لان المرايه مش هتشوف فيها غير نفسك انت

شاب فقرى
منور البلوج و ربنا يعينك ع اللى بيحصل معاك ده
اكيد محتاجين نتغير

ثورة said...

توضيــــــح

فعلا مش كل حاجه تقدر تشوفها بنفسك عشان مرايتك ساعات بتجاملك
فهتلجأ لمراية حد قريب منك
بس لو غمضت عنيك ومرضتش تشوف أو تسمع
يبقى مش هتعرف حاجه مهما كانت الصورة واضحة

دا احنا ساعات مبنشوفش مراية نفسنا حتى لو واضحة بسبب اننا مش عايزين ورافضين نفتح عنينا

وتبقى الحقيقة ساطعه واحنا بنهرب منها

إذن مرايات الدنيا كلها متساويش حاجه وانت مغمض عنيك

دا بس توديح بثيط عشان حسيت ان كلامي مكنش واضح


طحياطي الحارة وصلام بقى

halawa said...

من يوم ماتولدت بحب الاحصاء
وكان نفسي اشتغل في الجهاز المركزي
للمحاسبات

مش هصوت عندك
لأني شايف
ان مرايتي نسبية

60 في المية نفسي
40 في المية صحابي

لأني لازم أبقى شايفني كويس
قبل أي مخلوق
بعد كده تيجي الناس اللي أحبها
أو أثق في رأيها

وانت عارفني
مخلوق خزعبلي
نفسي i hope

كائن نورانى said...

بجد يا عاشق الحكاية دى جامده اوى

وللاسف ولا مش عارفه اسف ولا لا؟

الموضوع دا مسيطر اوى الايام دى

انا بجد استغربت لما لقيتك كاتب كدا

قلت عرف منين؟؟

بس مهم اوى فعلن تبص فى مرايتك

وياريت كل يوم عشان تشوف اذا كان فى اى شئ اتغير

تلحق تظبطه قبل ما يخرج الموضوع من ايدك

واظن ان لازم تشوف انت الاول

والى يشوف لك حد واثق انت فيه اوى

لان المجاملات بالهبل والنفاق كتير اوى الايام دى

بس حكمك بيكمله حكم الى حواليك

بس بجد سحر ولا شعوذه

عرفت ازاى؟؟

الخيط الرفيع said...

أنا لو بشوف فيها عيزة أشوف الحقيقه مني أو من غيري
واتعامل معاها صح سواء حلوة أو وحشة
لو حلوة اكمل ولو وحشه أسأل ازاي اتعدل
ولو عوزة أشوف فيها ايه
عيزة أشوف الصورة كما ينبغي أن تكون من غير غلطة بس اد شبه مستحيل

smraa alnil said...

بحس احيانا ان معاملتي مع غيري هي انعكاس لشخصيتي وطباعي واللي جوايا
بس ساعات غيري بيعرف يلبس وش حلو اوي
ومش بتقدر تعرف هو بيعاملك ازاي حتي اقرب الناس ليك
مرايتي هي انا بجد
واي تصرف مني او معاملة بشوف نفسي فيها
وفي نفس الوقت اي شي بكتبه احيانا بيبقي انعكاس لشئ جوايا او حاجة بحبها
مش عارفة انا شكلي بخرف ومش عارفة انا قلت ايه
بس هنشر تعليقي بقي وامري لله

REEMOO said...

كتير بحس انى مرايه نفسى
اعتقد ان مرايتى واضحه وبتوضحلى تقريبا 90% من اللى جوايا
ليا اصحابى ساعات بيبقو مرايتى بس مش دايما
بس الاكيد ان كلامى واسلوبى وكتابتى ورسمى هو مرايتى الحقيقيه
مدونتك جميله
هعدى عليك تانى
تحياتى :)

3ashe2elro7 said...

شكرا لكل اللى شرفونى و عدوا على الموضوع و سابوا تعليق و شكرا برده للى عدوا و مكنش معاهم فكه
بصوا بقى
المرايه حاجه مهمه اوى فى حياتنا و خصوصا معايا بعتبرها الحاجه اللى بتكشفلى الحاجات الغلط اللى ممكن تكون عندى لان الحاجات الكويسه بتبان بسهوله اوى و انت بتعرفها قبل ما حد يقولك عليها
انما انك تلاقى حد بيحبك و يكلمك ويقولك الحته دى مش كويسه او فيها غلط من دافع انه بيحبك فعلا مش من دافع انه عايز يطلع فيك غلط بتبقى صعبه شويه
خصوصا زى ما الكائن النورانى قال المجاملات بالهبل و النفاق كتير اوى و على فكره يا كائن ممكن يبقى فيه توارد افكار عادى يعنى
اكيد كمان لازم تتابع نفسك .. انت بتتغير للاحسن و لا للأوحش .... بتعلى و لا انت نازل لتحت بسرعه الصاروخ
مرايتك لوحدها منتنفعش و كمان مرايه اصحابك لوحدها متنفعش الاتنين بيكملوا بعض ولازم علشان توصل لنتيجه ان الحاجه دى فعلا موجوده و لا لأ تشوفها فى الاتنين
و يا سلام لو فيه مرايه تالته كمان
لان الحقيقه ممكن تكون مش كامله فى واحده منهم فيكملوا بعض
جميل انك تلاقى مرايات كتير و صادقه مش زى مرايه الساحره الشريره
جميل كمان انك تكون صادق و تتقبل النقد و الاعتراف بوجود اخطاء او عيوب فيك و الأجمل انك تحاول تصلحها وتظبطها
جميل اوى انك تكون صادق مع نفسك اوى و انك تكون قاسى عليها لانك لو دلعتها هدلعك اوى و دى بقى تدليعها وحش اوى

khaled said...

كده تبقى مراية ثلاثية الابعاد
ههههههههههه
بس تفتكر انها ممكن تتحقق؟

مستر ميدو said...

جميل أوي الموضوع ده يا عاشق الروح أنا شايف أن كل شي حوليك بتتعامل معاه بتعكس أكيد عنده شيء جواك مش شرط أنسان ده حتي الورق،الموبايل .....حاجات كتير هتلقيها بتعكس شيء من شخصيتك،الحاجات دي ممكن تكتشفها بنفسك
أمابالنسبة للأشخاص حتي لو الشخص ده أنت منتش قريب منه للدرجة إلي ممكن يواجهك فيها بنفسك هتلقي أنه تصرفاته وتعاملة معاك تلقائيا بتعكس مفاتيح في شخصيتك يعني برضه مراية نفسك ويمكن الموضوع بالنسبة ليا علمني كتير قوي قوي الاحتكاك مع ناس كتيره وناس بتعمل معاهم علاقة لفترة صغيرة وهتسبها ده بيشكف ليك شخصيتك قوي
بس وبشكرك مرة تانية علي الموضوع الجميل ده وديما يا رب
حميد

naryoma said...

اكيد مش دايما بكون نفسي مرايه
لان ممكن اكون شايفه نفسي صح وانا غلط
فمرايتي بتبقي
ماما او الانسان اللي انا مرتبطه بيه واحده صحبتي بحبها اوي
لانهم اقرب ناس ليا واكيد مش هايخدعوني
ودايما بثق فيهم
ودايما بنحتاج مرايه عشان نعرف احنا صح ولاغلط
بحييك علي البوست

3ashe2elro7 said...

khaled
سهل اوى انها تتحقق ايه المشكله لو انا مظبط علاقتى بنفسى و باصقائى و بعيلتى سهل اوى انها تتحقق
شرفتنى بالحضور و نزرت البلوج المتواضع
**********
مستر ميدو
عندك حق و ان كان حكم الناس اللى استمروا معايا و اللى قريبين منى بيبقى اصدق لانهم طبيعى يعرفوا شخصيتى اكتر ويقدروا يحكموا احسن
***********
naryoma
كده اعتقد انك حقتى المرايه الثلاثيه الابعاد اللى خالد مكنش مصدق انها ممكن تتحقق ربنا يكرمك و تحافظى عليها
ميرسى اوى على ذوقك

david santos said...

Hello!
Fantastic! thank you.
have a good day

BoTaNesToKeeSoo said...

سلامو عليكو

كل واحد فينا ممكن يكون عنده اكتر من مرايه بس طبعا نسبة صدقهم بتختلف مش صدقهم بمعنى انهم بيخدعوك بس لا ممكن يكونو صادقين جدن معاك بس بيختلف مقياسك ومقياسهم فبالتالى الصوره اللى بتاخدها منهم تبقى مش صحيحه

وانا بالنسبالى اكتر مرايه بحس صدقها بنسبة ميه فى الميه هى علاقتى بربنا لانى لو غلطت اى غلطه ولو صغيره علطول بتاثر على علاقتى بيه فساعتها اعرف انى لازم اعمل ستوب

والمرايه التانيه هى نفسى بس اكيد المرايه دى بتكون قاسيه شويه


اما بالنسبه لانى احب اشوف فيها ايه احب اشوف نفسى كما هى بدون ماسكات بدون زياده او نقصان

Xxxx sofy xxxX said...

المراية اصلا الهدف منها انها تعكس الشكل اللى قدامها ،
بس بتفرق عن كل واحد ، لانك لما تييجى تشوف نفسك فى المراية غيير لمل تشوف حد تانى او حاجة تانية...
1- لو انت عايز تشوف حد او حاجة تانية يبقى هتشوف شكلو عامل ازاى من زوايا تانية !!
2- بس لو بتبص على نفسك الموضوع هيختلف -طبعا ده موضوع عايز قعدة و نقعد نتكلم عن كل واحد بيشوف ايه لمل بيبص على المراية-بس الثابت اننا بنبقى عايزين نشوف شكلنا عامل ازاى و مش زى ماحنا بنشوف نفسنا لأ بيبقى زى ما الناس التانية بتشوفك و خصوصا انك عشان تشوف صورة كاملة لنفسك لازم تبص فى مراية -او هتبقى عامل زى اللى بيبص على نمرة العربية و هوة راكبها :) -.


كل دة بالنسبة للمرايات العادية (الزجاج)و المرايات دى بتبقى زجاجية و بتورينا كل اللى قدامها من غير متغير حاجة لانها جماد.
بالنسبة بقة تبقى مين، بالنسبالى انا ، انا و صديقتى هما المراية اللى انا بعتمد عليها اذا مكنش انا فى اغلب الاوقات !!!
و اكيد مبحبش اشوف فيها غير الحاجات الحلوة اللى فيا بس - اكيد مش قصدى على الشكل - .

و للحديث بقية.......