Sunday, March 25, 2007

مرايتى


***********************************************************
مرايتى


هوه مفيش مرايه هنا .... ؟؟
جمله عاديه و بنسمعها كتير و بتعدى زى أى حاجه بتعدى
بس المره دى معدتش عادى
لقيتنى بسأل نفسى .....
هوه الواحد محتاج مرايه علشان يشوف نفسه ؟!!
ومرايتنا بقى ممكن تبقى مين ؟
احنا ولا حد تانى .. ؟
و لو لقيت مرايتك تحب تشوف فيها إيه ؟

Wednesday, March 21, 2007

و الحل ايه ..... ؟

ممكن حاجه تتصلح طول ما الوضع كده ........ ؟؟
.
.
.
شكرا للصديق سكايار اهداؤه الصوره

Wednesday, March 14, 2007

شين كاف عين

ربنا ما يكتب عليكوا البهدله
من اسبوع كده قالولى عايزينك توصل امانه الزقازيق
قلت و ماله و هنيالك يا فاعل الخيرو الصواب
هيه مش الزقازيق بالظبط
انت هتركب الميكروباظ الداخلى علشان تروح الموقف اللى هتركب منه
قلت ما علينا
عشر دقايق و هتلاقى نفسك وصلت
بسيطه يا جماعه
ده انا حتى بحب السفر

عزمت الهمه و اعددت الراحله و ركبت و نزلت الزقازيق

بالله عليك يا اسطى متعرفش اروح مشتول السوق منين
ايه .. فين دى ياباشا ... هم قالولك ايه
اللهم صلى عليك يا نبى
العب العب العب .. هيه كده
الميكروباظ الداخلى طلع اتنين و لانى ابن ناس قلت ادلع نفسى و اركب تاكسى

و روحت الموقف
نسيت اقولكم انهم قالولى برده ان مواصلات المكان ده زى الفل ماشيه على طول و على عرض كمان
نزلت من التاكسى قالى ادخل من هنا هتلاقى الموقف
حاجه كده بتاع 2 كيلو مشى
عادى يعنى
ده حتى المشى رياضه
انى الاقى عربيه راحه هناك ابدن

قلت اكلم الراجل اللى هيستلم الفلوس و اتـاكد من المكان
قالى اركب مشتوووووووول السوق
و قوله نزلنى كفر براااااااش
هيه على الطريق

قلت خير
اكتر من نص ساعه علشان اوصل
و على طريق سريع اسفلت ... علشان محدش يقولى الطريق وحش و الراجل ماشى بالراحه

نطلع م الزقازيق و ندخل على منيا القمح
يااسطى انت ناسينى .. ابدا يا بنى .. ابنك ..طيب

نسيبها و ندخل على السعديين


كفر براش معاك يااسطى .. طيب يا عم لسه قدام شويه
قلت ياواد طنش خاااالص
اتخرص بقى و اسكت وان نسى يبقى جت منه و اقوله شوفت اهوه انت اللى نسيت

طيب الحمد لله وصلنا

الراجل بقى
و الله لتشرب حاجه و الله ماتيجى ابدن
ياعم ربنا يخليك ... توشكر
ابدن و الله ما تيجى .. حاجه ساقعه و لا شاى بقى
شراقوه بقى و غدوا القطر
خلاص يا عم الجو حر تبقى حاجه ساقعه
يروح و ييجى .. الراجل قافل .. شاى بقى
اعمل فيها ابن ناس و اقوله ابدن
و الراجل يعزم بقلب جامد .. الشاى مظبوط و لا سكر زياده
خلاص يا حاج لو مش تحلف .. زياده يا حاج
يعدى الناحيه التانيه من الشارع و يروح القهوه و يطلب
و هوه ف الناحيه التانيه
يا باااااااشا ......
الاتوبيس اهوه هتركبه ولا تستنى تشرب الشاى
طب يا حــــــاج
عايزشى منى حاجه

ســـــلام علــيــــــكوا يا حاج

Thursday, March 8, 2007

سو أااااااال

ف ساعه تهييسه جه الموضوع على بالى
....
....
....

ايه شعورك لو لقيت البابا أو الماما بتوع الإنت عاملين مدونه ....؟!!!
.....

.....
ايون مدونه
....
....
مدونه من بتوعنا دول
....
.....
داخل يتكلم فيها و يعبر عن رأيه فيها ايــــــــــــــــــــه
...........
هما مش بنى ادمين برده و لا إيــــــــــــــــــــــــــــه
......
....
...
السؤال موجه بالخصوص الى أصدقائى المدونين :

حلاوه
سكايار
ثوره
مينى
ماهى
مستيكنيس
الشعرا المظاليظ
أخف دم
بطوووووووط
محض روح

و كل اللى يدخل عندى و يقرأ البوست
سواء كان مدون أو لأ

فكر و جاوب ع السؤال
مستنى ردودكم و اجاباتكم على السؤال
عاشق الروح


مفترق طرق


من اكتر الحاجات اللى مصدقها فى الدنيا دى انك على طول واقف على مفترق طرق
دايما فى حاله تحفز ، يمين و لا شمال ، ابيض و لا اسود
ده حتى لما تيجى فى موقف ممكن تمسك فيه كل الامور فى ايدك تلاقى الظروف عاكستك
جيت فى الثانويه العامه .....
تا..تا....تا

ها علمى علوم و لا علمى رياضه ولا علمى شامل
انا عايز رياضه و هندسه و البيت عايز طب و صيدله
خلاص يا بنى عدى امورك و خد علمى شامل و أجل المواجهه سنتين
طبعا الظروف ابدا ، لغوا العلمى الشامل ، اصل دفعتنا دى طاهره من يومها
و جاءت لحظه القرار،
و انا طبعن و لا شمشون فى زمانه ... علم رياضه
و بالروح بالدم نفديكى يا رياضه ..... و دخلت رياضه
و ربنا كرمنى وجبت نتيجه فله ( بضم الفاء )
خلت الناس تطمع و هاتك بقى يا حنيه علشان يعملوا اللى نفسهم فيه

و انا ابدا ...لسه ثابت على موقفى ابدا لن يتزحزح
و خلصت و داخل على الكليه ...ها ناوى على ايه طبعا ؟؟
حلم حياتى املى و ذكرياتى ...
هندسه بيتى رول
يابنى غربه و بهدله ....و انا ادها
هاتك بقى يا تليفونات و ضغوط ، شويه لين و حنيه ، و شويه ضغوط و شتيمه و هزقه
انما على مين ...
عملت اللى فى دماغى

و ادى النتيجه
داخل على سنتين قاعد فى بيتنا
اعتقد دلوقتى جاوبت على السؤال بتاع القرار اللى اخدته و نفسك الزمن يرجع بيك علشان تغيره
بجد ممكن تكره نفسك لو اخدت قرار غير اللى الناس عايزاه
بالذات لو نتيجته اتأخرت شويه
عملت اللى انت عايزه ....
مش كنت تسمع الكلام ...
دايما كده مش قلنالكم تسمعوا كلام اللى اكبر منكم

ده بقى من نظراتهم بس ..
عارف لو بينطقوا و لا بيتكلموا .....
اديك ممكن تتنح و ترد
يمكن لانى حاسس انى واقف على مفترق طرق جديد
ممكن لانى واقف مع نفسى شويه
اعيد حساباتى
و ارتب اولوياتى
و احاسب نفسى على اللى فات
و دى حاجه م الحاجات اللى بعيد التفكير فيها
هل كنت صح و لا كان القرار غلط ....؟

عاشق الروح

Sunday, March 4, 2007

التطور الطبيعى للحاجه الساقعه

طب واحده واحده
وبلاش كل ده
ييجى مره واحده

لاتجنن كده
لو ده النظام معاك
بالشكل ده

مقدرش عليه
.....
......
FM نجوووووووووووووم
........
البرنامج ده برعايه ازووووووزه

عمرك شفت حاجه بتيجى كده قفش ؟

يعنى تشوف حد لاول مره
انت صديكى
انت حبيبى
أنت الذى ...... أنت الذى
وتقعد تسهل (بكسر التاء و الهاء) هياما و حبا و عشقا

أنا بقى من الناس اللى تحب كل حاجه كده تيجى حبه حبه

وانت بتبنى العلاقه بينك و بين اى حد تانى مهما كانت نوع العلاقه دى طالما انها اختياريه ( بعيدا يعنى عن العلاقات الاسريه ) بتكون لسه بتتعرف على الشخص ده و تكون وجهة نظر مبدأيه عنه

فيه مناطق ممكن من بعد اول لقاء تتفتحله .... بس برده ف مناطق ممنوع الاقتراب او التصوير

وبرده مع افتراض حسن النيه فى الشخص ده و انه كويس و ابن ناس و ابن حلال بس ده ميمنعش انى اخد بالى و انا بتعامل معاه و ان العلاقه تبدأ تزيد و تبدأ الثقه تزيد بينا و تتبنى

فى العموم مع كل حد جديد انا بعرفه ببتدى اتعرف عليه و اعرفه و هوه يعرفنى انا مبقاش عارف هوه بيفكر ازاى او حكمه على الامور ازاى انما لما خلاص نتعامل كتير مع بعض و كل واحد بيشوف فى التانى انه شخص محترم و كويس تبتدى الدنيا تفك شويه بشويه بس طبعا من غير ما حد يعدى حدود الذوق و الادب و الاحترام و بعدها شويه بشويه كتير من الحواجز بيتشال

على فكره الجو برده فريش و مش قافش ....... مش كل حاجه بالقلم و المسطره

انا فى رأى ان ده احسن كتير من انى اتعامل معاه برده بحسن نيه و اديله الامان الكامل من الأول وبعدين اكتشف انه شخص مش كويس بالقدر الكافى أو ان عنده عيب هيأذينى و يضرنى ف الوقت ده ممكن ابتدى ابعد عنده

تعالى بقى نرجع بالكادر شويه ونفتحه حبتين :

هيدخل معانا فى الصوره الناس اللى كانت شايفه بدايه العلاقه و تطورها بس متعرفش تفاصيلها :

هتشوف الأولانى انسان صاحب صاحبه و زى السجاده العجمى كل ما تقدم تزيد قيمتها
انما التانى ده هوائى مش بيبقى على صاحب على الرغم من انه ممكن يكون اضر من المعرفه دى

اللى خايف منه ان حد يفهم كلامى ده انه خوف او حذر لما تيجى تبدى تتعرف على الناس لأول مره أو انه يفهم من كلامى ده انى بقول اقعد طول عمرى اتعرف عليه لو عملت كده يبقى هفضل فى قفص حديد مش هأخرج منه الموضوع ابسط من كده خصوصا انه بيتطور بعد كل لقاء او حوار بينكم هتوضح الامور اكتر و اكتر

" التطور الطبيعى للحاجه الساقعه "

كتير بيفسر اللى بعمله ده انه تحليل و تعقيد و حاجات كده كتير او انى بحطه ف امتحانات و اختبارات و حاجات كده بس الموضوع بحساب المكسب والخساره يبقى مظبوط ..... لو اتعاملت معاه كده و هوه كويس فالعلاقه فى تطور مستمر و انت مش خسران و لو اتعاملت معاه كده و هوه مش كويس هتبدأ تكتشف ده مع مرور الوقت وبرده مبتبقاش خسران

وده ميمنعش ان فيه ناس اول ما تشوفهم ترتاحلهم .. تحس كده ان كيميتك متظبطه معاهم ..

بس برده هاخد بالى و انا بتعامل معاهم والسكينه متسرقنيش

ده مجرد رأي بسيط ..... يحتمل الخطأ و الصواب
**************
اللى أقصده ببساطه انى لما اتعرف بحد لاول مره وربنا كرمه بخفه دمه و قبوله عند الناس من أول مره مش اجرى مأمن له و فاتحله صدرى و برده لما اتعرف على حد لاول مره و ألاقيه مش ماشى كده زى السكينه فى الحلاوه أقول عليه اتم و دمه تقيل و خنقه و مينفعنيش

عاشق الروح


Saturday, March 3, 2007

حلم سريع

البوست اللى فات زعل ناس منى أو بمعنى أصح خلى مودهم يتعكر لما قرأوه
معلش يا اسيادنا ....
ممكن اكون زودت الحزن ( بكسر الحاء ) شويتين
معلش يا عم
سكايار ...... بس على رأى حلاوه ..
أجيب منين ؟!!
و بعدين هوه أنا هاكتب على مزاجكم
ما تيجوا تكتبوا بدالى أحسن ......
لا و الله لانتوا جايين
امشى يا واد انت و هوه
انتوا صدقتوا و لا ايه
*******************
فاكرين فيلم عيال حبيبه ( ثقافه افلام بقى )
لما قعدوا يعيدوا ف تصوير المشهد علشان الواد البطل ترجعله الذاكره بتاعته
متعرضتش للموقف ده قبل كده ؟؟
لأ مش انك تفقد الذاكره بتاعت الانت ..... انك تتعرض لموقف او تمر بلحظه ف حياتك تقول :

انا شفتها فين قبل كده
انا حصلى ده قبل كده
الحد ده أنا شفته قبل كده
كل ده ف لحيظات
و نتيجه لكده تلاقيك بتسترجع المشهد اللى حصل و بتتصرف على أساسه ...
الغريبه بقى ان المشهد اللى انت شفته فى منامك ده عمرك ما تفتكره غير لما يحصل ف الواقع
و الجميل انه يكون السبب انك تتصرف كويس اوى و تتطلع بنتيجه ايجابيه لما يحصل ف الواقع
الموضوع ده حصلى كذا مره
ومش عارف بقى حد حصله الحاجات دى
و لا كفى الله الشر ده المرض البطال اللى بيقولوا عليه

عاشق الروح