Wednesday, May 30, 2007

الدنيا كلها شبابيك


مش عارف اوصف الشعور اللى كنت فيه النهارده وانا بتفرج على التلفزيون
نبتدى من شبابيك
خلاص يا عم بقينا ف القرن مش عارف كام و عشرين ....... يعنى ايه ؟!!!
زمان كانت الرجاله بتعاكس ..... اللى شايف نفسه و حاسس انه فلتة زمانه كان بيعاكس
انما دلوقتى الرجاله بقت بتتعاكس .... اه و الله ده اللى كانوا بيتكلموا فيه
بنت من أسرة تحرير مجلة احنا اسمها سندس نزلت تعمل تحقيق حول المعاكسة
اتصدمت من ان شاب بيقولها اننا احنا اللى بنتعاكس دلوقتى
هوب قلبت التحقيق و بدات تتطأس على الموضوع ده لقيته موجود فعلا فى اوساط الشباب
طبعا مش عايز اقول انى قاعد مستكنيص على الآخر
يا سلام يعنى على كده بقى نقعد فى البيت و مش نخرج بالليل لوحدنا
و لو حد عاكسنا واحنا ماشين فى الشارع نقوله يا ســــم
بكره نعيش و نشوف و اللى يعيش يشوف اكتر
***************
بتفرج على برنامج 90 دقيقة وهوه بناقش قضية توريد شغالات للسعودية
اخيرا لقينا حاجه ننافس فيها وهوه توريد شغالات
هنافس الفلبين و سيريلانكا يدوبك كده على قدنا
من بعد الدكاتره و الموظفين و من بعد ما كنا بنساعد الناس على بناء حضارة لبلادهم
جه الدور علينا اننا نوفرلهم الدلع و الرفاهيه
طبعا ما احنا لازم نقوم برسالتنا على اكمل وجه
امال ايه مش دى مصر ام الدنيا
الله يرحمك يا رجولة
عجبنى ساعتها لما أ/ مصطفى بكرى رد وقال لو ده حصل يبقى معتش رجاله فى مصر
*******************
شوية وقلبت اتفرج على العاشرة مساءا
الضيف ......... د/ احمد بهجت
السبب .............. احتفالا برجوعه من امريكا بعد نجاح عملية زرع القلب
انسان عادى جدا بيتكلم عادى تحس انه ممكن يكون جارك او قريبك
متشعرش وانت بتشوفه انك بتكلم واحد من اللى نفختهم الفلوس
ولا انه عنده ثروه تبلغ عدة مليارات
فكر اقتصادى محترم قلما وجد فى مصر
ازاى اعمل حاجه مفيدة وبرده هتجيب فلوس
تواضع .. احترام لنفسه ... ولغيره
ثقة بنفسه لا تصل للغرور .... مقتنع بما يقول و متقبل ان يكون على خطأ
ثقة بالله ... كلامه لا يخلو من الحمد و الثناء و الاعتراف بفضل الله
تشعر من كلامة بانسان لديه من الرحمة ما يكفى ليظل انسان
طموح وامل فى غد مشرق نتيجة عمل و جهد مش دلع و انتخه
لسه فيه امل
بجد
شكرا أ / منى الشاذلى
شكرا د/ أحمد بهجت

8 comments:

REEMOO said...

موضوع المعاكسه ده مبقاش غريب لأننا فى زمن فعلا مبقاش أى شئ فيه غريب
ده أحنا هنصدر بنات بلدنا خدامات فى البلاد التانيه يبقى غريب لما البنات تعاكس الشباب
أنا عن نفسى مبقتش بستغرب من أى حاجه بتحصل فعلا
اما بخصوص د/أحمد بهجت جميل بجد ان يكون لسه فى النوعيه دى من رجال الأمال فى مصر
أعتقد ان وجوده فى الايام والعصر ده بيقول أن لسه فى أمل
تحياتى

enoOo said...

شبابيك ايه يا زعيم؟
أنا بتفرج على البرنامج ده علشان اتفرج على البنت هبه بس
مش مهم بيقولوا ايه
لانه كله فى البطيخ
---------------------
وماله
-----------------------
دكتور أحمد بهجت
والله مش هتفرق
كله زى بعضه
سينا من سونيا

خربانة خربانة

enoOo said...
This comment has been removed by the author.
shisho said...

لا تفرق طبعاايااينو والكل مش زي بعضة فيه يعني ان انت تبقي مش راجل كويس وهتبقي مبسوط ولا الناس هتحترمك وساعتها مش هتفرق برضه! وان كان قصدك علي حياتنا فاعتقد بكرة احسن وكفاية انك تعامل ربنا في كل حاجة تعملها صح ولا مش صح يااينو

sakayar&romio said...

يا سلااااام يا سي عااااشق ... انت قاعد بقى تقلب في التليفزيون يا خويا والناس قاعدة بتمتحن ... طب يا أخي راااااعي ظرووووف النااااااس شوية
بالنسبة لأحمد بهجت ... فأنا أول مرة شفته فيها قلت الواد ده شكله محترم وابن نااااس بس يا خوووفي ليطلع في الآخر شكل وبس
وبالنسبة للشغالات فانا متفق معاك ...الأم لازم ترعى أولادها في كل شيء ... فلازم مصر ترعى العرب بالشغالات

وبالنسبةلموضوع المعاكسة ... فهسيب روميو يكمل تعليق
شكرا يا سكايار
بالنسبة لموضوع المعاكسة يا أستاذ عاشق ... ف كان من أجمل المواقف اللي اتعرضلها وأنا ماشي في الشارع إن واحدة تعاكسني وتقوللي يخرب بيت جمال عينيك ... وأنا طبعا من يومها وأنا نفسيتي تعبااانة جدا لإني مش عارف ربنا هيخرب بيت جمال عينيا إزاي؟؟؟
وبالنسبة لإينوووو أفندي اللي بيقولك أنا بتفرج على شبابيك علشان اشوف هبه ... أنا بأكدلك يا مسيو إينوووو إن شبااااب مصر اللي بيتفرجوا على شبابيك كلهم بيتفرجوا عليه علشان هبه
الميكروفون مع السكايااار
وختاما .... شكرًا

3ashe2elro7 said...

reemoo
اول نقطتين فى البوست يقتلوا الأمل فى اى حد بس لما شفت اللقاء بتاع بهجت قلت لسه الامانى ممكنه
شرفتينا بجد و تحباتى
************
اينو
اقول ايه و اعيد ايه يا تافه يا تافه
عروسه حلاوه حلاوتها ماسخه
اما بالنسبه لاحمد يهجت
خلى عندك امل على الاقل اضمن نفسك ولا ايه يا بشمهندس
************
shisho
ميرسى على ردك على اينو ... عندك حق
شرفتنا بالزيارة و تعالى تانى
***********
سكاير و روميو
الناس الكويسه بتيان و الله و حتى لو حد بيمثل دور الطيب بيبان و الناس مش بتصدقه و تحس انه فيه حته غلط عنده
احب ارد على روميو برده
ياريت حضرتك تتمل و تقعد فى بيتكم علشان نفسيتك مش تتعب تانى
و السلام امانه
و بخصوص هبه احب اقولك يا تافه يا تافه

sakayar&romio said...

اخص عليك يا عاااااشق يعني انت تنكر انك بتتفرج على شبابيك علشان هبه؟؟؟
أنا عن نفسي بطلت اتفرج عليها بقالي سنتين
الدور والباقي عليكوووووو

الخيط الرفيع said...

مش عرفة اقولك اية
بس أكيد الجرعة بتاعة البرامج كانت زايدة شوية
ربنا معاك وشكرا علي مشاركتك لينا
تسلم وربنا يكرمك
انا عندي بوست جديد
عدي وحاول تجاوب علي السؤال