Saturday, August 11, 2007

البعد ....صف تانى


رجعت تانى انور مدونتى اكيد

العب و اطنطط م تانى
وأرغى على قلبكم وأقول اللى عاوزه
حكى حريتشى كرامتشى

صيحات فرحه هيه هيه هيه هيه
شكرن شكرن شكرن
وصيحات استهجان وكلام من نوعيه يادى القرف
امشى اطلع بره ياد

و اللى عايز أنبوبة
يصحى من الغيبوبة
واللى واقف مستنى
معلش غصب عنى
فيه أزمة فى الأنابيب

أكيد الحمد لله على بداية مرحلة جديدة وخطوة كنت أحب أبدها من قبل كده بس ربك لما يأمر و يريد

نقطة أولى

ليه لما تحصل خطوة جديدة فى حياة الواحد مننا يبقى ده معناه ان اللى كان قبل كده بقى درجة تانيه أو صف تانى

عرفنا صاحب جديد يبقى احساس اللى كنا نعرفه بقى صف تانى
بقى عندنا أصحاب كتير يبقى احساس الأهل انهم بقوا صف تانى
اتجوز يبقى احساس الأهل صف تانى
ولما الام تخلف يبقى احساس العيل الاولانى صف تانى

ف رأيى ان الواحد لما يقدر يبدأ خطوة جديدة يبقى قدراته و امكانياته حصلها نوع من التطور و تقدر تستوعب الجديد ده جنب اللى موجود أساسا من غير ما تزحزحه و إلا ساعتها يبقى استبدال باستهبال مش تطور للأحسن

نقطة تانية

أكيد البعد عن الناس اللى بنحبهم و بنعزهم صعب باعتبار أننا شعب رومانسى عاطفى حالم حبتين يجيد الارتباط بالناس اللى بنحبهم بس البعد ده احيانا بيكون اختيار واحيانا بيكون اضطرار بس اللى أكيد انه لخير وحاجه كويسه مش غتاته ورزاله وهبل و استعباط

بشوف ان البعد علشان السبب ده بيكون احسن من البعد بفعل دنيا الملاهى و التلاهى اللى واخدانى و مش قادر أتواصل معاهم وساعتها يبقى البعد اللى برده غصب عنى بقى نوع م النسيان و التنفيض للناس دى و تبتدى تاخد م العلاقه دى لحد ما تنتهى بفعل عوامل التعرية

البعد من ناحية تانية بيبقى اختبار حقيقى للمشاعر و النفوس هيه كانت بفعل التواجد و الوجود ف المحيط ولا بسبب حب حقيقى ف الله

الموضوع ده بدأ معايا من زمان اوى اتولد ف الكويت و أعيش هناك لحد ما حرب الخليج تحصل و انزل اعيش ف مصر و فى الجامعه اقضى 5 سنين معظمهم فى الكليه اللى بعيدة عن بيتى اعرف ناس تانيه جديدة من كل مكان ف مصر ناكل و نشرب وننام و نتعلم و نلعب و نروح و نيجى مع بعض كانت بجد اوقات حلوة ثم ... الرحيل

ودلوقتى الحمد لله بشتغل دنيا جديدة وناس جديدة و أكاد أكون متأكد أنه هيجى وقت و اسألك الرحيل علشان مرحلة جديدة تبتدى

وتبدى مرحلة جديدة و معاها تبتدى تعرف مين اللى كانوا أصحاب بجد ولسه على اتصال و مين اللى خلاص فينيتوا
بنفرح اوى لما تلاقى تليفون فى عيد او مناسبة حلوة او حد يعزمك علشان تحضر مناسبة حلوة و الأجمل انك تقدر تلبى دعوته و يلاقيك عنده وقتها ( حاجه تفشخر صحيح )

بس المهم اننا نوظف كل اللى بيحصل بطريقه ايجابية أحول السلبى فيه لحاجه كويسه
بدل ما أبص عليها بطريقة سلبية وأحول الخير اللى فيه لحاجه زفت

زتونة الموضوع مش فى ايه اللى حصل
زتونة الموضوع فى طريقة تعاملك مع اللى حصل

12 comments:

Halawa said...

ينصر دينك يا استاذ

نفيسسسسسسسسسسة

Anonymous said...

salamo 3alekom 2walan mabrook 3ala eljob elgdeed rabena ywfa2ak isa ana ta2reban 2awel mara a3mel comment l7ad bas begad elpost to7fa zay mat2ol keda fe elgoon enta la5aset 7agat kteer fe elpost da begad rabena ykremak yarab. 5olood

mamado said...

هيييييييييييييييييييييه
انت بتقول ايه

الشــاطر ميــــدو said...

ممكن زتونة لو سمحت

هههههههه

الله عليك فعلا

وهي دي الدنيا

ومفيش دوام للحال

تحياتي

3ashe2elro7 said...

حلاوة

هيه هيه هيه

انا شاطر انا شاطر

3ashe2elro7 said...

5olood

مبرووووك النجاح

و ليا الشرف كله مش حته منه انى اكون اول واحد يخليكى تكمنتى عنده

بس هوه علشان الموضوع اللى حلو و لا علشان افتكرك م المرتب

هههههههههه

شرفتينى و نورتى

3ashe2elro7 said...

مامادو

هيييييييييييييييييييه

انت فيييييييييييييييييييين

3ashe2elro7 said...

ميدو

الزتون كله ليك يا باشا

دوام الحال م المحال فعلا

بس شاطرتنا نخليها للاحسن

ثورة said...

البعيد عن العين بعيد عن القلب
عيش ندل تموت مستور


الأمثال الشعبيه بسم الله ماشاء الله بتعبر عن السواااد اللى جوا هههههههههه

كنت على طول بقول الإنسان بيختبر ف وقتين
وقت غضبه ووقت رغبته
هيبيع لما يغضب أو لما يرغب ف مصلحة معينه ؟ هل ممكن ساعتها يبيع أي حاجه ؟

بس اكتشفت اختبار تالت
البعد
لما يبعد هيبيع ولا لأ ؟

اللى يعيش ياما يشوف
وعودن حميدن أحمدن محمودون .. دودن
:)

3ashe2elro7 said...

و من واقع تجربتى ان البعد عن الناس دى مكسب

هههههههههه

اه موافق على الاختبار التالت ده

و اللى يلف يشوف اكتر

شرفتى المنطقه

sa7arkash said...

تانى مرة ازورك
انا مختلفة معاك..اللى فات عمرة ما بيكون صف تانى

بالعكس.. اللى فات ..والذكريات
ليها تاثير عظيم فى حياتنا..وساعات بيكون اشد من الحاضر

ده طبعاا للى عندهم اصل ومش بيتنكروا للماضى

3ashe2elro7 said...

sa7arkash

انا مقصدش كده خالص

بالعكس انا بحترم الماشة و الذكريات جدا خصوصا لما نتعامل معاهم بالعقل جنب العاطفه

العنوان يمكن هوه اللى عمل سوء التفاهم ده و قصدت اتكلم بيه عن نقطتين اتنين بس اللى هم الفراق و البعد اللى بيحصل بين الناس و مسأله شعور الناس انهم بقوا صف تانى فى حياة الناس اللى بيحبوهم لما يحصل للناس دى جديد ف حياتهم

شرفتى المدونه اكيد و نستنى من حضرتك زيارات مستديمه