Thursday, March 8, 2007

سو أااااااال

ف ساعه تهييسه جه الموضوع على بالى
....
....
....

ايه شعورك لو لقيت البابا أو الماما بتوع الإنت عاملين مدونه ....؟!!!
.....

.....
ايون مدونه
....
....
مدونه من بتوعنا دول
....
.....
داخل يتكلم فيها و يعبر عن رأيه فيها ايــــــــــــــــــــه
...........
هما مش بنى ادمين برده و لا إيــــــــــــــــــــــــــــه
......
....
...
السؤال موجه بالخصوص الى أصدقائى المدونين :

حلاوه
سكايار
ثوره
مينى
ماهى
مستيكنيس
الشعرا المظاليظ
أخف دم
بطوووووووط
محض روح

و كل اللى يدخل عندى و يقرأ البوست
سواء كان مدون أو لأ

فكر و جاوب ع السؤال
مستنى ردودكم و اجاباتكم على السؤال
عاشق الروح


23 comments:

sakayar said...

إيه ده أنا الصايع الوحيد اللي قريتلك وهعبرك وأرد عليك كمان ...يلا ده عشمي برضه ...أنا لو بابا بتاع الإنت أو الماما بتاعة الإنت دخلت تعمل بلوج ..وأنا عرفت عنوان البلوج ده ...أكيد هخش أشلفطهم ...علشان قاعدين بيصيعوا ع النت ولا مؤاخذة وسايبين ابنهم قاعد يضرب بانجو....حبيب قلبي ...اوعى تزعل ... أنا بصيتلك بس....ده لو البابا والماما بتوع الإنت ...لكن لو البابا أو الماما بتوع العاشق ...فأكيد هرحب بيهم وادخلهم ف التهيييس بتاعنا...وههريهم أسئلة لما تصحى من النوم لحد ما يندموا إنهم قعدوا على النت ...وليه أساسا يقعدوا على النت وهوه لسه مدهون ...مش خايفين هدومهم تتوسخ من الدهان؟؟؟؟
أما لو البابا أو الماما بتاع الآنا ...ف وحياة ربنا ...يبقى آخر يوم ليهم ف بيتنا .. هوه احنا هنخلص منهم ف البيت نلاقيهم عندنا ع البلوجات ولا إيه...لكن والله فكرة حلوة ..ممكن من خلالها نناقش أفكارنا بتوسع ...والناس تدخل بقى تناقش ويغلطوهم ...وتبقى زيييييييط

ثورة said...

هي الابتســــــــــــــــامة العريضة اللى انت عارفها بس مش صفرا زي بتاعة نااااس
وأكيد هتريق لحد الصبح
يا ترى هيكتبوا ايه الأمامير دول ؟
ف الطبيخ ولا ف البطيخ ولا ف السياسه ولا هيفضحونا ع النت ويقولوا ع اللى بنعمله ف البيت
طب يبقوا يشتكوا مني كده وشوفوا انا هعمل ايه
وربنا أدخل معاهم مناظرة وأنا دماغي جزمة ونفسي طويل وعارفه انهم هيزهقوا من أول نقطة

وألم عليهم أصحابي المدونين واديلهم رشاوي عشان يدخلوا يأيدوني
بلا حق بلا حرية بلا نيلة دلوقتي ... المهم نغلب

ومش بعيد ماما تتغاظ ومتبقاش عارفة تفشل غلها مني ازاي
تلاقي كي بوردات بتتشال بقى وانتو عارفين اللى بيحصل

التكنولوجيا بوظت أخلاقهم
مالها العيشة البدائية
لا كانت عارفه فرق بين كاميرا ولا سماعات ولا ماوس وبتشيل حاجات ملهاش لزمة وبعرف أشغل الكمبيوتر برضه

دلوقتي للأسف بقت ناصحة
حسبي الله ونعم الوكيل

أما دادي حبيبي الجنتل الكوووووووول
هدخل أعاكسه وأرسم عليه بقى ومش هعرفه إنه أنا
وأبعتله رسايل ع الايميل بتاعه ممكن نتعرف يا قمر
العذراء والشعر الأبيض
وماما تدخل على ايميله بالصدفة تلاقي بنات بيكلموه وبيبعتولوا رسايل
أروح قايلالها آخر حاجه كنت أتوقعها إن بابا يكون كدا
أنا مصدوووووووومة مصدووووووووومة
وااااااااااااااااااااااااء
قدوتشي .. مثلي الأعلى .. يطلع كدا ؟
كرامتشك يا ماما
حقك .. حريتشك
مش لازم تسكتي أبدددددددددددا

بيـــــــــت العـــز يا بيتـــنا
الانترنت خرب بيــــــــــــــــتنا

دكتور مستكنيص said...

بداية اختيار موفق ياعاشق لموضوع جديد وفكرته جامدة فعلا بالنسبة ليا لو لقيت الحاج أبو مستكنيس عامله بلوجاية هو او الحاجة فانا هسرق الباس الوورد وادخل علي السيتنج واعمله الدخول للمدعويين بس وطبعا هما مش هيدعوا حد فمحدش هيدخل واقوم جاي بقي فاتح المدونة قدام أبويا واقول يااااااه متين زيارة وعشر تعليقات بس الاقبال ضعيف أوي
يابني لازم نحافظ علي ابهاتنا وامهاتنا احنا ناقصين يفسدوا اخلاقهم انا ممكن أوافق يقعدوا علي النت بس في حالة واحدة إني أكون قاعد جنبهم عشان اخد بالي منهم ماهو المفروض اني أعرف اكتر منهم يبقي نعاملهم بنفس السلاح اللي بيعاملونا بيه

محض روح said...

والله فكره مطرقعه اكيد
بس مش متصوره ان بابا او ماما ممكن يعملو كده
اكيد هما بشر ومن حقهم يعبر وعن رايهم بس يمكن احنا
جيل لتربى على ان الكمبيوتر موجود والنت كمان ياعنى الموضع بالنسبه لينا مش معضله هما حسه ان الموضوع هيكون تقيل عليهم انهم يعدو يكلمو ويحكو على نفسهم ومشكلهم زى ما حنا بنعمل
واكيد برضه هما مش هيكون عندهم مساحه الوقت الى عندنا
يعنى انا مثلا ماما مش مقتنعه بموضوع المدونه من بابه اصلا بتقولى ازاى تعدى تكتبى كل ده وايه لزمته وحولت افهماانى بكتب علشان مطقش
فبرضه مفهمتش
فانا متصورش عن نفسى انها ممكن تعد تكتب حاجه علشان حتى لو كتبت هتكتب تقول ايه
ربنا حليم ستار واكيد ليه حكمه فى كده مش ريدلنا الفضايح قدام الناس
:))))
فعلا صدق عمر ابن الخطاب لما قال
لا تربو اولادكم على شاكلتكم لقد خلقو لزمان غير زمانكم
وتحياتى يافندم

Menas said...

ايه الفكرة دى بس
ديما كده سباق....
بس فى العموم فكرة جديدة وحلوه
بس انا عن نفسى لو الماما بتاعة الانا عملة مدونه ليها هتحصل حرب اهليه فى البيت ده احنا اتنين وربنا ما يوريك ايه اللى بيحصل ما بالك الماما كمان
بس عموما لو الماما بتاعة الانا عملت واحده هشجعها طبعا وهكون من اول الناس اللى بينصروها
امال فين الديمقراطية اللى بنتكلم عنها

mahe said...

موضوع جديد فعلا وموفق احمدووووووو مش بتحبها بس انا بحب اقولها

واكيد لو لقينا الماما بتاعت الانا وبتاعت ميناس كمان لانها تختلف الامهات على فكرة

اكيد لازم ناخد بأيديها وهى طالعه اول سلمة من سلالم النت والانفتاح على التكنولوجيا

وممكن كمان تغلبنا بس اكيد لا على مين استحاله وانا موجودة حد ينفاسنى

بس مش مشكل اهو تجرب مش بخسارة

Halawa said...

والله اللي أعرفه ان أبويا لو وصل للموضوع ده هيبقى مجرم وانت عارفه أكيد
هيبقى وزير أو هيترشح رئاشة
ياما هيبقى حسين فهمي التاني
وفي الحالتين بيتنا هيبقى زحمة
وهنتفضح ونتسيط وكالعادة الدنيا هتولع بينا وفينا
أما ست والدتنا المصون
اللي مدلعاني آخر دلع
طبعا انتو عارفين حكاية الشرابات
هقدر أقنعها بطريقتي اللي انتو عارفينها برضه
ان أنا بتفرج ع التليفزيون أصلا
لأن الشاشة سودا ومش عايز قر
أو أقنعها ان دي برامج تعليمية
ولا علاقة لذلك الجهاز اللي قدامها بالكمبيوتر
لأنها كل أما تعدي في ميدان الصالة تلاقيني بقرأ بلوجات وبضحك
تقوللي ربنا يديم عليك عقلك
كل اللي قدامك سطور وبتضحك
أرد عليها تعليم ياأمي
تعليم
جسمها مش هيقبل الكائن الغريب ده

-_- said...

طب و ايه الضرر ؟

احمد عبدالحي said...

تصدق بالله لو ابويا رحمه الله عليه عمل مدونه كنت افرح جدا علي الاقل ممكن نشوف بعض تاني ولو للحظات او اعرف حته هوه عامل ايه في الاخرة
وتخيل ان كل الاموات اللي ما شفناهمش من زمااااااااااااااان هوه ضايفهم عنده وانا عارف ابويا رحمه الله عليه عشري وابن نكته وكان بيحب الناس بجد
كان هيبقي مجرم في التدوين الشبحاوي
واما لو امي ربنا يخلهالي يارب
فدي كانت ان شاء الله هتعمل البلوج كله عن كيفيه صناعه المكرونه اليشامل
وهتدورلي عن بنت الحلال وبرضك هتفضل مؤونه ان ابنها شاعر بجد ويستحق يبقي في التلفزيون مكان اي حد المهم انه يبقي في التلفزيون مع انها زهقت والله من متابعت القنوات اللي انا بسجل فيها علي الفاضي
بجد موضوع عسل زي اللي كاتبه

3ashe2elro7 said...

سكايار :
علطول سباق كده واول واحد بترد فعلا صايع يابنى والله انت اللى قلت على نفسك كده ...معلش كنت رخم شويه النهارده

3ashe2elro7 said...

اديبتنا الكبيره:
هيه بتبدأ برده بالطبيخ و بتنتهى بالسيطره الكامله على الجهاز و النت وابقى شوفى مين اللى يقعدك ع النت تانى و اما بابا ف متخافيش هتلاقيه مأمن ضهره و بلاش تهديه النفوس دى

3ashe2elro7 said...

مستيكنيس:
علطول مركز كده ف العداد بكره يرفعوه و تتمسك مخالفه ف المرور ههههههه بس اكيد لازم تحافظ عليهم من الانحراف
امال ايه بقى احنا نربى فيهم العمر ده كله و ف الاخر ييجى النت يبوظهم

3ashe2elro7 said...

الى محض :
مش عارف ليه حابب اقول محض بس اسم مطرقع و الله و يعلق فى الودان
موضوع الكلام و البق على النت انا ليا فى وجهه نظر انى صاحبى اللى شايفنى و شايفه اولى انى اتكلم معاه و ساعتها النصيحه بتبقى اجمل و افيد لانه بيشوف الكلام بانطباعات الوش انما لو برغى ع النت مع صاحبى اللى حافظه و حافظنى يبقى توكلى على الله
و استفسار بسيط : كنت حابب اتأكد بس من مقوله سيدنا عمر بن الخطاب لو سمحتى

3ashe2elro7 said...

مينى و ماهى الاخوات :
ممكن لما ماما تنضم ليكم تنظموا الوقت بينكم و يلا يلا وقتك خلص طيب دقيقه بس اكمل البوست ..لأ الوقت خلص و الله بقى لو اجرنا الجهاز و هوه جوه البيت و بالقلوس اللى تتلم نجيب اللاب توب ممكن يفك أزمه ساعتها

3ashe2elro7 said...

حلاوه :
اذا كان على ابوك فلانه فعلا زى ما بتقول وزير او ريس كبير فمقامه لاب توب يا معفن مش حته جهاز انت قعدت عليه الناس مقامات و من عرف مقامه ف الهنا بات
سلملى عليه اوى الراجل ده وحشنى خصوصا انه لما بييجى بييجى الخير معاه
اما الماما بتاعت الانت فربنا معاها و يصبرها عليك اللى مخلفين ناس زينا ليهم الجنه

3ashe2elro7 said...

الى شرم : رد مختصر جدا فعلن خير الكلام ما قل و دل ميرسى على ردك و فعلا مفيش ضرر بس السؤال هوه اهتماماتهم هتبقى ايه ساعتها

3ashe2elro7 said...

ابو حميد :
ازيك جنابك و الله البلوج نور و اتحزم و رقص من الفرحه
ربنا يخيلك على مجاملتك الجميله
و الراجل اللى انت ابنه لازم يبقى فعلا الناس بتحبه و ليا تعليق هاقوله ليم لما نتقابل

david santos said...

Hello!
This work is very nice, thank you
Have nice week

إبراهيم محسن said...

صباح المدونات

إيه يا عمنا الموضوع ده..ده أنا لو حصل كده أكسر البيت..مفيش غير كمبيوتر واحد في البيت..مين هيقعد عليه..انا ولا هما

انا مليش دعوة هقعد بقى وهما يروحو سيبر

انا هدمر بلوج ماما وهسرق الباسوورد..أما بابا فهعمله مدونة مخصوص باسم بنت واحط صورة مزة واخش اعلق عنده واحبه واخليه يموت فيه ويكتبلي العربية اللي مش بيركبهالي

بس ده المفيد

3ashe2elro7 said...

ابراهيم :
البلوج نور بوجودك
بس هوه ليه على طول ظالمين البابا بتاع الاحنا ونقول ونعمله حبيب وبتاع غراميات
طيب بالله عليك هوه اللى يعملها مره و يتجنن و يتجوز ممكن يعملها تانى
هيه مره واحده ف العمر حتى اسأل البابا بتاع الانت كده
واااااااااااااء
ماليش دعوه انا عايز اتجنننننننننن

جبهة التهييس الشعبية said...

القصاص لأسرانا الشهداء رجاء التوقيع وارسال الرسائل

فاتن said...

اتمنى ان يكون ما تقترحه حقيقي
اولا لانه قد يكون من حقهم
ثانية هكذا ستتحقق "احلامي"

koukawy said...

عادي من حقهم يبعبروا عن رأيهم