Saturday, March 3, 2007

حلم سريع

البوست اللى فات زعل ناس منى أو بمعنى أصح خلى مودهم يتعكر لما قرأوه
معلش يا اسيادنا ....
ممكن اكون زودت الحزن ( بكسر الحاء ) شويتين
معلش يا عم
سكايار ...... بس على رأى حلاوه ..
أجيب منين ؟!!
و بعدين هوه أنا هاكتب على مزاجكم
ما تيجوا تكتبوا بدالى أحسن ......
لا و الله لانتوا جايين
امشى يا واد انت و هوه
انتوا صدقتوا و لا ايه
*******************
فاكرين فيلم عيال حبيبه ( ثقافه افلام بقى )
لما قعدوا يعيدوا ف تصوير المشهد علشان الواد البطل ترجعله الذاكره بتاعته
متعرضتش للموقف ده قبل كده ؟؟
لأ مش انك تفقد الذاكره بتاعت الانت ..... انك تتعرض لموقف او تمر بلحظه ف حياتك تقول :

انا شفتها فين قبل كده
انا حصلى ده قبل كده
الحد ده أنا شفته قبل كده
كل ده ف لحيظات
و نتيجه لكده تلاقيك بتسترجع المشهد اللى حصل و بتتصرف على أساسه ...
الغريبه بقى ان المشهد اللى انت شفته فى منامك ده عمرك ما تفتكره غير لما يحصل ف الواقع
و الجميل انه يكون السبب انك تتصرف كويس اوى و تتطلع بنتيجه ايجابيه لما يحصل ف الواقع
الموضوع ده حصلى كذا مره
ومش عارف بقى حد حصله الحاجات دى
و لا كفى الله الشر ده المرض البطال اللى بيقولوا عليه

عاشق الروح

4 comments:

Menas said...

مش شرط يكون حلم حلمته وحصلى فى الواقع بس بتحصل كتير انك بتتعرض لموقف تحس انك مرت بيه قبل كده بكل تفصيله فيه صغيره قبل كبيره نفس المكان نفس الاشخاص نفس الفعل

halawa said...

مين البت المزة اللي في الصورة دي
لحسن تتطلع مخطوفة أنا عارفك هتيجي في القاهرة اليوم مقبوض عليك رجعها لأهلها
حصل لسه معايا يوم الخميس كنت قاعد في ميكروباص الجامعة قدام البنك الأهلي الظهر مفيش ناس مستني
افتكرت شخص ما قلت لو يعدي يبقى لابس كذه وبدأ شكله يترسم
وبعديها بدقيقة والله ماكملت عدى من جنبي وهو مش طالب ومش متوقع انه يجي المكان ده في الوقت ده وياريته حلم
لأ ده ون شووووووووت
مفاجئ جه في بالك هيعدي أو هيحصل كذه وتلاقيه حصل يالهوي تحس انك ولي

SAKAyAR said...

بتحصل كتير ...المهم متكترش من الكاتشب ... وعايز أقولك متخافش انت مش مريض ... انت تعبان ... خد قرصين وهم بعد النوم وقبل الصحيان هتبدأ يطلعلك أسئلة من بتوع لو صحيت م النوم وهتبقى كويس

دكتور مستكنيس said...

تعرف ان الموضوع ده بالذات في الحلم ياما بيجنني اني أشوف حد معين وأصحي هموت عشان افكره لكن ولا الضباب
وساعات بقي يحصل العكس ياما أقابل ناس وابقي متأكد مية في المية ان الوش ده أنا شفته واتكلمت معاه واقعد اعصر دماغي قابلته فين؟ فتكون الإجابة اللي بريح بيها نفسي عشان أعرف أنام ....جايز في الحلم
موضوع حلو ياجميل بس والنبي ياخويا بلاش حكاية طولت عليكم دي عارفين والله انك ابن ناس ومحترم وطعم لكن عاوزينك تلك وتطلع وتتكلم واللي يزعل من كده شاورلي عليه