Wednesday, March 14, 2007

شين كاف عين

ربنا ما يكتب عليكوا البهدله
من اسبوع كده قالولى عايزينك توصل امانه الزقازيق
قلت و ماله و هنيالك يا فاعل الخيرو الصواب
هيه مش الزقازيق بالظبط
انت هتركب الميكروباظ الداخلى علشان تروح الموقف اللى هتركب منه
قلت ما علينا
عشر دقايق و هتلاقى نفسك وصلت
بسيطه يا جماعه
ده انا حتى بحب السفر

عزمت الهمه و اعددت الراحله و ركبت و نزلت الزقازيق

بالله عليك يا اسطى متعرفش اروح مشتول السوق منين
ايه .. فين دى ياباشا ... هم قالولك ايه
اللهم صلى عليك يا نبى
العب العب العب .. هيه كده
الميكروباظ الداخلى طلع اتنين و لانى ابن ناس قلت ادلع نفسى و اركب تاكسى

و روحت الموقف
نسيت اقولكم انهم قالولى برده ان مواصلات المكان ده زى الفل ماشيه على طول و على عرض كمان
نزلت من التاكسى قالى ادخل من هنا هتلاقى الموقف
حاجه كده بتاع 2 كيلو مشى
عادى يعنى
ده حتى المشى رياضه
انى الاقى عربيه راحه هناك ابدن

قلت اكلم الراجل اللى هيستلم الفلوس و اتـاكد من المكان
قالى اركب مشتوووووووول السوق
و قوله نزلنى كفر براااااااش
هيه على الطريق

قلت خير
اكتر من نص ساعه علشان اوصل
و على طريق سريع اسفلت ... علشان محدش يقولى الطريق وحش و الراجل ماشى بالراحه

نطلع م الزقازيق و ندخل على منيا القمح
يااسطى انت ناسينى .. ابدا يا بنى .. ابنك ..طيب

نسيبها و ندخل على السعديين


كفر براش معاك يااسطى .. طيب يا عم لسه قدام شويه
قلت ياواد طنش خاااالص
اتخرص بقى و اسكت وان نسى يبقى جت منه و اقوله شوفت اهوه انت اللى نسيت

طيب الحمد لله وصلنا

الراجل بقى
و الله لتشرب حاجه و الله ماتيجى ابدن
ياعم ربنا يخليك ... توشكر
ابدن و الله ما تيجى .. حاجه ساقعه و لا شاى بقى
شراقوه بقى و غدوا القطر
خلاص يا عم الجو حر تبقى حاجه ساقعه
يروح و ييجى .. الراجل قافل .. شاى بقى
اعمل فيها ابن ناس و اقوله ابدن
و الراجل يعزم بقلب جامد .. الشاى مظبوط و لا سكر زياده
خلاص يا حاج لو مش تحلف .. زياده يا حاج
يعدى الناحيه التانيه من الشارع و يروح القهوه و يطلب
و هوه ف الناحيه التانيه
يا باااااااشا ......
الاتوبيس اهوه هتركبه ولا تستنى تشرب الشاى
طب يا حــــــاج
عايزشى منى حاجه

ســـــلام علــيــــــكوا يا حاج

22 comments:

mahe said...

والله انا قلت انت اختفيت ليه فجأة
بس الحمد لله ظهرت من تانى بموضوع جديد

بس يا عينى يا بنى انت اتبهدلت

مش عارف مكان بتنزله ليه

بس بجد محترم عمو اللى سعدك

ده عمل الواجب وزياده كفايه الشاى

المفروض تضايف الراجل ده يوم
المرة الجايه هيودوك الزرقا

ربنا يعينك

دكتور مستكنيص said...

قلت ياواد طنث خالث.....حبيبي ياعاشق الروح هنقول المسعود مسعود لو مسكوه جيتار وعود وقليل البخت يطلعله العضم في الكرشة ومقلول الطهي يعضه الكلب في المولد بقي الشراقوه يعملوا معاك كده.؟ يخرب بيتك بس سيبك انت اكتر حاجة عاجباني الاخراج السينمائي اللي انت عملته ده محسسني كانك جاسوس وعملت عمليه لمصر وبنوصف بقي بفيلم تسجيلي خط سيرك وياجماعة التزكرة دي مسكها بخط ايده اموااااه والطريق ده مشاة طب عنوانه فين عشان نروحه
لا حلوة بجد حوار انك تصور صور للموضوع ككل
دوس ياكبير يامسيطنا في البرتغال والارجنتين

محض روح said...

هو ده التفائل الصح
المشى رياضه فعلا
واحمد ربنا انك وصلت
اصلا
والشاى ده سيم هو كان يقصد ان كانته الى تجيبه مش هو
ياعنى بعد يابنى ويابشا هو الى هيجب الشاى
ده انته طيب اوى
:))))))))
انا بغلس على فكره

محض روح said...

اه صحيح التذكره ام جنيه ونصف عمله شغل
:)))))

3ashe2elro7 said...

ماهى :
الحمد لله مازلنا موجودين على الساحه و مننا كتير لا حرب بتنفع و فيرس بيأثر
لو فضل الواحد مايروحش المكان اللى ميعرفوش ان شاء الله مكنش نزل من بطن الماما بتاعت الهوه
اما الراجل الشركاوى فهوه فعلا عسل اوى عمل زى اهل الزرقا الدمياطه تشرب شاى و لا مش كييف تتعشى و لا تنام خفيف

مستيكنيس :
انت كده شردتنى اوى كل ده انا و مش عارف
و بعدين انا اول ما حسيت ا الرحله هتعمل كده قلت شكلها هتحتاج بوست الحق ياواد و صور كام صوره وذكرى و ايهاب توفيق و كده
محض :
كان اجمل موقف بجد بعد العزومات دى كلها تلاقيه بيقولك ها يا باشا الاتوبيس اهوه هتقعد و لا تتوكل على الله و الله ما بصيت حتى ف وشه مينفعش انك تقول غير سلام عليكم

sakayar said...

يخرب بيت عقلك ...ايه البوست الجامد ده؟؟؟ بس بصراحة فضحت الراجل اللي كنت هتوديله الأمانة...لكن عندك حق ..وهوه ليه ما يقابلاكش ف أرض محايدة ...على ملعب الاتحاد مثلا؟؟؟بس فعلا اخراج ممتاز ...دي الفكرة اللي كنت بقولها لحلاوة ف بوسته"لا تحسد" خد التذكرة وسمي البوست بالرقم بتاعها

sakayar said...

لا مؤاخذة يا عاشق نسيت أعلق على (شين كاف عين) عيب عليك الألفاظ المحترمة دي تتقال على بلوج مسخرة زي بتاعك

ثورة said...

شكع ؟

باب الشين .. باب الشييييين .. باب الشيييين
أها
لاقيته ... ممممممممممم .. ج .. ح ... خ عدي عدي عايزين الكاف
شكر؟ لأ مش دي
شكّ ؟ لأ لأ
شكى ؟ لأ برضو
مفيش شكع خالص

أمال ايه دي
تكونش شينكع ؟
طب شكعين ؟
طب شكافع ؟
شينكافع شكافعين شينكعين


أنا جيت هنا ازاي؟

إبراهيم محسن said...

يا عمنا انت كنت في الزقازيق يعني فلاحين الزقازيق يعني لا تدخل بيت ولا تتغدى وززي بعضه الناس هناك كده الموضوع بالنسبة لها أنا مين وأنا إيه مش مهم غيري عاوز إيه

يالله حمد الله على السلامة

جميله بو حريد said...

مدونه عسوله جدا
ايه جماعه المواهب اللى طلعت فى صنانيع على البلوجر ده
اما بخصوص الرحله الشاقه ده فاحمد ربنا انك ما رحتش جوانتنموا فى الاخر

3ashe2elro7 said...

سكايار
انت عارف اننا بناخد بالحديث اللى بيقول من ستر مسلما
و اننا من عادتنا اننا شباب بيستر
و كمان عارف اننا اكتر ناس متواضعه علشان كده بنتحرج لما حد يشكر فينا
بس انت عارف البوست ده العادى بتاعى يعنى

اديبتنا الكبيره / هدى
شين كاف عين
شرقاوى كريم عظيم
كنتى هتلاقيها فى معجم الياس

استاذ / ابراهيم
شكلك روحت الزقازيق و بتحب اهلها موووووووت
شرفت المدونه و بجد انا سعيد انى قدرت اخليك تدخل المدونه تانى و تقرأ حاجاتى البسيطه اللى بكتبها

جميله ابو حريد
شرفتى المدونه و ميرسى على مجاملتك
اكيد لازم اقول الحمد لله ده كان يوم فظيع

3ashe2elro7 said...

عايز اقولكم ان مش ده كان نهايه اليوم حصلت حاجه و انا مروح هابقى اقولكم عليها
بجد كان يووووم جميل

smraa alnil said...

ههههههههههههههههههههههه

شكلك وحشششششششششش
منتظر ايه من ناس قاعدين في مشتوووووول السووووق
ههههههههههههههههه
بجد ضحكت جدا
المهم انه يوم من عمرك

Menas said...

اعمل خير وارميه البحر

الخيط الرفيع said...

سلامو عليكو
هههههههههه
بجد انت كاتب الموضوع بشكل تحفه
وكمان بوثائق مصورة
وأجمل حاجة روح التفاؤل الواضحة
في وسط زحمة الأحداث

3ashe2elro7 said...

سمراء النيل
يادى الهنا يادى السرور : سمره عندنا فى بلوجنا
سعيد جدا بتشريفك وتعليقك و اللى يسعدنى انى اكون قدرت اضحكك و لو حاجه بسيطه خصوصا الفتره دى

ميناس
الخير عمره ما يترمى البحر ابدا لان ربنا شايفه و مطلع عليه

الخيط الرفيع
ميرسى على اشادتك بالموضوع
بس سؤال : يعنى انفع اشتغل صحفى و اعمل تحقيقات

-_- said...

انت عملت الواجب و زيادة بس اتبهدلت جامد اوي

Ahmad Hegab said...

انت كدا تمام و متستناش رد للمعروف اللى عملته

انت واقف بعيد كدا ليه ماتيجى تشرب شاى

love4u said...

انا افتكرت مسرحيه المتزوجون مشهد
جورج سيدهم




و تشرب شاى
طب تشرب شاى
مش عاوز شاى



هههههههههه
بس تمام الله ينور

3ashe2elro7 said...

love4u
يا مرحب يا مراحب بيك ع البلوج
و الله انا كنت نسيت المشوار ده
بس على الرغم من غرابه الموقف و اليوم الا انه هيفضل فى بالى علطول و مش هنساه بسهوله

Anonymous said...

انت اللى كاتب ده يا واد

كان فين ده كله؟

بس بجد جامدة يا ريس



اينووووووووووووو

Rivendell** said...

تؤتؤتؤ

مالهم الشراقوة بقىىى


تلاقي منوفي مهاجر من منوف واستوطن في الزكازيك


وبعدين بلاش شتيمة بقى


واه احنا اللي فطرنا القطر في رمضان