Thursday, March 8, 2007

مفترق طرق


من اكتر الحاجات اللى مصدقها فى الدنيا دى انك على طول واقف على مفترق طرق
دايما فى حاله تحفز ، يمين و لا شمال ، ابيض و لا اسود
ده حتى لما تيجى فى موقف ممكن تمسك فيه كل الامور فى ايدك تلاقى الظروف عاكستك
جيت فى الثانويه العامه .....
تا..تا....تا

ها علمى علوم و لا علمى رياضه ولا علمى شامل
انا عايز رياضه و هندسه و البيت عايز طب و صيدله
خلاص يا بنى عدى امورك و خد علمى شامل و أجل المواجهه سنتين
طبعا الظروف ابدا ، لغوا العلمى الشامل ، اصل دفعتنا دى طاهره من يومها
و جاءت لحظه القرار،
و انا طبعن و لا شمشون فى زمانه ... علم رياضه
و بالروح بالدم نفديكى يا رياضه ..... و دخلت رياضه
و ربنا كرمنى وجبت نتيجه فله ( بضم الفاء )
خلت الناس تطمع و هاتك بقى يا حنيه علشان يعملوا اللى نفسهم فيه

و انا ابدا ...لسه ثابت على موقفى ابدا لن يتزحزح
و خلصت و داخل على الكليه ...ها ناوى على ايه طبعا ؟؟
حلم حياتى املى و ذكرياتى ...
هندسه بيتى رول
يابنى غربه و بهدله ....و انا ادها
هاتك بقى يا تليفونات و ضغوط ، شويه لين و حنيه ، و شويه ضغوط و شتيمه و هزقه
انما على مين ...
عملت اللى فى دماغى

و ادى النتيجه
داخل على سنتين قاعد فى بيتنا
اعتقد دلوقتى جاوبت على السؤال بتاع القرار اللى اخدته و نفسك الزمن يرجع بيك علشان تغيره
بجد ممكن تكره نفسك لو اخدت قرار غير اللى الناس عايزاه
بالذات لو نتيجته اتأخرت شويه
عملت اللى انت عايزه ....
مش كنت تسمع الكلام ...
دايما كده مش قلنالكم تسمعوا كلام اللى اكبر منكم

ده بقى من نظراتهم بس ..
عارف لو بينطقوا و لا بيتكلموا .....
اديك ممكن تتنح و ترد
يمكن لانى حاسس انى واقف على مفترق طرق جديد
ممكن لانى واقف مع نفسى شويه
اعيد حساباتى
و ارتب اولوياتى
و احاسب نفسى على اللى فات
و دى حاجه م الحاجات اللى بعيد التفكير فيها
هل كنت صح و لا كان القرار غلط ....؟

عاشق الروح

11 comments:

sakayar said...

صباح الخير عليك يا عم العاشق
إيه المزاج اللي قالب دراما ده؟؟؟
بص أنا طالما اخترت طريقي ...يبقى لازم اتحدى العالم كله ...واكمله ...لكن علشان اكمله لازم أستعين بقوى أكبر وأعظم
صحيح انت بتحاول ...لكن ممكن ماتفيدش محاولاتك ...بس ما تيأسش ... مافكرتش إن ده ممكن يكون ابتلاء من ربنا علشان يشوف طاقة صبرك أد إيه؟؟
افتكر دايمًا إن نبي الله أيوب ...واهو نبي ... ربنا ابتلاه لمدة 18 سنة....أنا مابقولش إنك هتبتلى لمدة 18 سنة ...بس ماحدش عارف الخير فين ..ومحدش عارف لو كنت اشتغلت دلوقتي أو لو كنت دخلت كلية غير كليتك أو لو كنت سمعت كلام المعارضين ليك على طول الخط كان إيه اللي ممكن يحصل؟؟؟
أيوه الواقع مش جميل ... لكن ربنا دايمًا فوووق وشايفنا ...دايمًا قووول يا رب طالما انت رضيتلي كده ...فأنا راضي باللي انت كتبتهولي ...بس ما تقفش ... ومتخدش الحياة قفش ... كل شيء بييجي ف وقته ...وكل وقت وبيبقى لينا لازمة ...ف حاجة معينة حتى لو ماكنش ده حلمنا أو دخلنا فيعه غلط زي حلاوة ما بيقول ... لكن أكيد لازم ننجح ونكمل
آسف طولت ..بس أنا شايف حالة من الاكتئاب على بلوجات كتير اليومين دول وما ينفعش أتفرج ..حتى لو كان جوانا حزن ...فلازم نعيش الحزن ونعديه بس ما نقفش فيه ولا ناخدها قفش

3ashe2elro7 said...

لو أخدت بالك يا سكايار انى بقول تحت دى حاجه م الحاجات اللى بعيد التفكير فيها يعنى برده مقررتش هل انا كنت صح و لا غلط
لما بتبقى واقف فى مفترق طرق بجد احيره بتبقى ملياك
انا م الناس اللى بتقول علطول " بكره احلى " من مبدأ ان كان مش صح فعلى الاقل اضحك على نفسى و اصبرها رافعا شعار التفاؤل و الابتسامه تعلو الوجوه دايما
مسأله ان تقعد مع نفسك و تعيد حساباتك حاولت اعملها كتير قبل كده بس للاسف مش بعرف اقفل على نفسى و اعتكف بمجرد ما الاقى حد يقولى مثلا عايزك و لا انت فين ما تيجى ..اضرب بلانس و اخرج ..ليه معرفش بس ده ميمنعش انى لازم اعملها
موضوع الوقفه مع النفس ده مش مجرد قرار اخدته و ندمان عليه لأ الموضوع اعتقد انه اكبر من كده ترتيب اولاويات و محاسبه نفس على اللى فات اكيد لازم يكمل بتخطيط للى جاى علشان يبقى التفكير ايجابى او على الاقل برده تحليلى تقدمى
لما تقف و تلاقى نفسك كل الوقت اللى فات محققتش حاجه على المستوى المادى و مقصدش فلوس لأ اقصد حاجه ملمووسه كده يبقى لازم تعيد حساباتك
لما تلاقى نفسك بعد كل الاحلام الكبيره و التخطيط الفظيع اللى انت كنت عامله محققتش حاجه يبقى لازم تقف مع نفسك و تعيد حساباتك
لما تلاقى سلسله طموحاتك واقفه كلها على خطوه و انها لو اتأخرت كمان و كمان ممكن تضيع منك حاجات يبقى لازم تعيد حساباتك

sakayar said...

مين قال إنك على المستوى المادي -يعني الملموس- ما حققتش حاجة؟ لو عايز تقعد مع نفسك بجد وتحاسبها يبقى تحاسبها بالعدل مش تظلمها ...يا ظالم هتروح من ربنا فين يا مفتري ...ما بلاش أنا إيدي طويلة ف الكتابة... بص يا حبيبي ... كونك عملت حاجة للناس مش لنفسك فإنت ف نفس ذات الوقت حققت حاجة اسمها عاشق الروح...بلاش نذكر أسامي... بداية أنت انسان متعلم ...يعني فيه فرق بينك وبين أي صايع قاعد ف الشارع ...إنك متعلم ..ده كبداية ...ثانيًا انت كنت من فريق المتفوقين أيام المدرسة ...هتقوللي كل ده مش مهم ...وكله بقى بطيخ بعد التخرج ... هقولك كفاية إنك كل اللي حواليك بيحبوك وده ف حد ذاته نجاح إن مفيش حد لما بيتذكر أدامهم عاشق الروح غير وبييجي أدام عينيهم صورة شخص محترم وابن ناس وعلى دين ... أنا أحسبك كذلك ولا أذكيك على الله ...هتقوللي معملتش حاجة لنفسي ملموسة ...هقولك كل اللي فات ده يخليك بطل مش مجرد واد عنده 23 سنة ولسه ما اشتغلش ... احنا بنعمل اللي علينا .. وأنا متأكد مليون % إنك لو تقدر تعمل أكتر من كده كنت هتعمل ... ومتاكد مليون % إن نقطة ضعفك أدام نفسك ... أقصد اللي بتمسكهالك نفسك لما تيجي تحاسبها ..هيّ الشغل ...وانت عملت كل حاجة وأخدت بالأسباب ...يبقى فاضل إنك تدعي ربنا وتتوكل على الوكيل أما نقطة بكرة احلى من النهاردة ...ف ده بيتعارض مع حديث للرسول (ص) قال" لا يأتي زمان إلا الذي بعده شر منه" وأنا من مكاني هنا مش بدعوا إلى الاكتئاب لكن ده كلام الرسول (ص) بس مش معنى إن الزمن هيبقى فيه شر إن الشر ده للكل ... لأ طبعا المؤمنين بس هما اللي يقدروا يعيشوا كويس في الزمن ده وأي زمن تاني ...ليه تقول بكرة أجمل م النهاردة لما ممكن تقول النهاردة حلو وبكرة حلو وكل الأيام حلوة ؟؟؟؟ على فكرة أنا مش سلبي ولا بارد ولا واحد معندوش احساس ... بس القضية إن أنا عندي يقين قوي جدا ف ربنا ...أحيانًا بيقل الايمان لكن طالما موجود يبقى مفيش حاجة هتوقفني عن اللي بعمله بالظبط زي ماهدى بتقول ...إن شا الله أموت شهيد لتحقيق هدفي سواء الناس شايف نفسي لسه محقتش أو ماعملتش بس طالما أنا لسه عايش يبقى لازم أحقق وط
الما انت وصلت لمفترق طرق يبقى لازم هتحاسب نفسك ...كل اللي بقوله من الأول للآخر ما تظلمش نفسك وانت بتحاسبها ...فيه مسائل قدرية وفيه مسائل كونية ...وفيه .. وفيه ..خد كل ده ف الحسبان واوعى تيجي على نفسك ...افتكر حسناتك زي ما بتفتكر سيئاتك ...افتكر نجاحك ...زي ما هتفتكر أوقاتك الصعبة
آسف على التطويل للمرة التانية
لما تصحى من النوووم انسى كل اللي فات وابدأ أحلى ساعات
الحياة....لما تصحى من النوووم

-_- said...

ده مستقبلك .. اعمل اللى يريحك

محض روح said...

بص بقى ديه تلات مره اعلق على البوست ده
عارف لو موصلش انا مش هعلق تانى
:((((((

محض روح said...

ههههههههههه
اشمعنى ديه
والله معلقه ابليها 3
يادى الفضايح

محض روح said...

مممم
استنى كده انا كنت بدوس
PREVIEW
هتلقيهم عندك
بقى
ايه البلوج الغريب ده بس مانا بعلق عند كل الناس ازى الفل

ثورة said...

كنت بعتقد ديما إن القرار اللى آخده بنفسي ويطلع غلط
أفضل من قرار خدهولي غيري حتى لو كان صح

أصل دي حياتي أنا وهي حياة واحدة

لو كنت هعيش عمرين كنت قلت معلش أما نخلي واحد لينا وواحد للحبايب يعملوه حقل تجارب لآرائهم ونصايحهم

وبعدين سكايار قال الكلام كله ومخلاش للواحد حاجه يقولها
وعلى رأيه هي مش سايبة وكله محسوب ومدروس و أكيد الوكيل عاين لنا أحسن حاجه بس يمكن بيختبر صبرنا وإصرارنا

ونختم بكلمة أ/ محمد منجي
اوعي تسلم دماغك للتفكير السلبي

3ashe2elro7 said...

الى شرم
*********
نورت البلوج يا شرم
********
الى محض روح
******
اخيرا التعليق وصل بس اعتقد انه مش ده التعليق اللى انتى عايزه تقوليه على الموضوع ... مستنى برده تعليقك و لا انتى كسلتى تكتبى
*******
الى ثوره
**
موافق على رايك بخصوص انى انا الى اخد القرار اللى خاص بيا حتى لو طلع غلط بس على الاقل اكون اتعلمت ازاى افكر و اخد قرارى بس برده الناس اللى حواليا و عايزين يشاركونى القرار بيعملوا ده من دافع حبهم مش غتاته يعنى
جميل انى اسمع منك اخر تعليق و جمله بتاع أ/ منجى خصوصا بعد الضجه اللى اتعملت بسبب اخر بوست ليكى على مدونتك .. ده هيوضح للناس انك مش مكتئبه او داخله على مبادئ استسلام قوليلهم ان ثوره عايشه و مش هتموت و ده بالفعل مش بالكلام بس مستنى الاثبات علشان اصدق انا كمان

Menas said...

انا حد من الناس بشوف مدام خد قرار يبقى خلاص اتحمل مسئوليتهومش معنى انك تاخرت شويتين انك تشتغل فى مجالك تعيد حساباتك
وبعدين عمره ما كان صح ان مدام مجموعة متفقه على راي وشايفه ان ده لمصلحتك يبقى مهناه انهم صح وانت اللى خطا
وكل تاخيره وفيها خير وبعدين الصح ان لما يكون الموضوع يخصنى يبقى لازم القرار فيه يطلع منى انا وده مش معناه انى ماسمعش اللى حواليه بس فى الاخر لازم انا اللى اقرر

3ashe2elro7 said...

اكيد كل واحد بيتحمل مسؤوليه قراره... ولازم كل واحد ياخد قراره اللى يخصه ..ده صح بل على العكس ده الاصح انما ده ميمنعش من الاستفاده من خبره الناس اللى حواليه اللى اكيد لازم تتاخد جوه حساباته و هوه بياخد القرار
موضوع الشغل و تأخيره منكرش انه مضايقنى بس شور ان لما وقته هييجى مش هيتاخر هييجى بالدقيقه و الثانيه زى ما ربنا كاتبه
اعده الحسابات مش معناه الندم و طبعا ده انا مقصدش كده خالص انما علشان الاستفاده من التجربه فى اللى جاى بتفكير بيزق لقدام لأ الندم البكا على الراح ميدويش الجراح