Thursday, August 16, 2007

اسمحيلى أعشقك

تسمحيلى أعشقك ..... ؟
ضحكة عينيك الطيبة
صبرك صمودك قوتك
حبك حنانك رقتك

اسمحيلى أعشقك
وأعدى فوق بحر الأنين
و أمشى على أرضك سنين
ارتوى من نبع قلبك


اسمحيلى أعشقك
و أكون أمير
مالك ممالك قلبك الدافى الأمين


اسمحيلى أعشقك
وأكون معاكى ف سكتك

وأكون سند وأكون معين
وأكون شريك خطوة نجاح
وامسح أى ماضى يكون أليم

اسمحيلى أعشقك
وأكون ف وقت الفرح عيدك
وأكون روح تجرى فى وريدك
واكون ف وقت الحاجه ايدك
وأكون ربيعك

اسمحيلى أعشقك
وأكون أمانك من سهام غدر الزمن

وأكون ضياكي ف عتمة الليل الغميق

وأكون أمل لحظة رحيل

تسمحيلى أعشقك ..... ؟
وتكونى شمسى
وتكون عينيكى هيه الدليل

و تكونى نجمى
وسط الليالى السهرانين


اسمحيلى أعشقك

ما بين ايديكى
راسم طريقى وسكتى
شايف حياتى بتبتدى

ف اسمحيلى أعشقك

38 comments:

sakayar said...

ولما اسمحلك ترجع تاني وتبصبص لفلانة وعلانة ... ما انت طول عمرك فلاتي وبتاع بنات اعمل ايه مش هقدر اثق فيك

جامدة يا روميوووووووووو

ثورة said...

بيطلعوا منين دول
الكمنتات كانت زيرو من دقيقه واحده
اعمل ريفرش واجي الاقي كمنت

مش هقولك حاجه يا سكايار
هسيبك لضميرك

اسمحيلى أعشقك
وأكون ف وقت الفرح عيدك
وأكون روح تجرى فى وريدك


اسمحيلى أعشقك
وأكون أمانك من سهام غدر الزمن
وأكون ضياكي ف عتمة الليل الغميق
وأكون أمل لحظة رحيل

تسمحيلى أعشقك ..... ؟
وتكونى شمسى
وتكون عينيكى هيه الدليل
و تكونى نجمى
وسط الليالى السهرانين



يجي منك وربنا
و دي مين بقى إن شاء الله ؟
مرسي مطروح ؟
؛)

هههههههههههههه

Eman Eltaher said...

ايه يا عم الكلام الحلو ده

لا و الله كلام حلو و رومانسى

تحياتى ليك

dr.Roufy said...

كلمات جميلة فعلا
تحياتي

الخيط الرفيع said...

تسمحي تسمحي
ايه جو الادب دا
لا فعلا بولايت بوي
الميزة الاستئذان في كل حاجة ما شاء الله
والله ما بقلسش بجد جديدة والكلام لطيف
هو كدا الواحد لما يبقي كسيب نظرته للحياه بتتحسن شويه
هههههههههههههههه
والله بردوا ما أقصد تقليس بس يلا نكسب فيك ثواب ونضحكك شويه بعيد عن جو الشحم والزيت والدوسه علي الزراير البتروليه
ههههههههههههههههه
اسكت يا بقي ادخل أدامي يا لساني
دا في ناس كدا عليهم حاجات

ما علينا غروش غروش

يلا شد حيلك ربنا معاك
والله بدعيلك علي طول

حبيبة الرحمن said...

تسمحلى اعلق :)

كلامات رقيقه لانسان احساسه اقوى من كلامه

كلها جميله وقويه واحساسك فيها عالى واكتر جزء عجبنى بيوضح مدى الرومانسيه والحب والتضحيه من وجهة نظرى هو ده :


اسمحيلى أعشقك
وأكون معاكى ف سكتك
وأكون سند وأكون معين
وأكون شريك خطوة نجاح
وامسح أى ماضى يكون أليم

بيوضح ان حبك مش كلام وبس لا وتضحيه وفعل

:) تحياتى لعاشق الروح

أخف دم said...

ازيك يا عاشق يارب تكون بخير وكل مدونى بلدنا المصون كويسين
القصيدة جميلة وموسيقاها جميلة بس خللى بالك من رتمية تفعيلات القصيدة .. ما تخليش الوزن والموسيقى والحفاظ على القافية يشغلك عن المعنى الأساسى للنص ..
احنا أخوات ولازم ننصح بعض عشان القصيدة الجاية تبقى احلى
ربنا معاك ويوفقك
ومستنيين جديدك

Fahem_Kora said...

الله الله
انت سخن يا بنى
لا حول ولا قوة الا بالله
كل ده من اسبوعين روتيشن
امال بقى لو دخلت فى الشغل الجد
قولتلك
انت مش حمل فيلد يا زعيم
تعاللى معايا أوفيس
التكييف جميييل
وحاجة اخر الاجة
بس بقى
ايه ده
مفيش احساس
اما انت واد من غير مشاعير صحيح



ميزووووو
شكلنا كدة داخليين فى سكة تانية؟


ايه ؟



هنرقص؟؟؟؟؟؟؟؟

Halawa said...

اسمحيلي
الله بحب ولاد الناس المؤدبين
شاطر ياعااااشق
هههههههههههههههههههه

مش عايز أبوظها
علشان انت على سفر وكدهون

ألا مش كسرنا إزاز نيو ايميدج
بااااااالهوي كان يوم صعب بجد

يلاااااااااحسن الختتتتتتتتتام

3ashe2elro7 said...

سكايار

استر عليا يستر عليك ربنا

كده على الهوا

لا و كمان بتقول اشاعات

اسمحلى انت بس وانا هابقى مؤدب خالث

3ashe2elro7 said...

ثورة

اسمها ميرسى مطروح مش مرسى مطروح

ههههههههههه

يا جماعه عده العادى بتاعى و اقل حاجه عندى انا بس عايز اسيب فرصه للشعرا الشباب علشان ياكلوا عيش

هههههههههههه

3ashe2elro7 said...

ايمان الطاهر

يا هلا بيكى عندنا

شرفتينا و نورتينا

يا ظالمه الرجاله

هههههه

تحياتى

3ashe2elro7 said...

دكتور روفى

اول زياره و ان شاء الله متبقاش الاخيره

شرفتينى و نورتى البلوج

3ashe2elro7 said...

الخيط الرفيع

الادب فضلوه على العلم

بالنسبه للنظره للحياه فاعتقد انها متغيرتش و لا حاجه هيه من يومها كده

بشوفها كويسه و ان شاء الله اللى جاى احسن بس بيتوقف على اللى احنا بنعمله و ده اللى بيخلى الناس بتشوفنى متفاؤل من غير لزوووم

يمكن الخطه مرسومه و شايف ايه اللى انا عايزه قدام شويه

اخدت خطوه و حاسب خطواتى اللى جايه بس مفيش حاجه بتظهر منهم ف الصوره غير لما يؤووون الأوان ولما ييجى عليها الدووور

افتكرى لما كتبت ف بوست و قلت ان الحاجه قبل اوانها او بعد اوانها بتبقى غلط و زى قلتها

و كمان براحتكم البلوج بلوجكم و تتفسحوا و تلعواى فيه زى ما انتوا عايزين مش بلوج اخوكم و لا ايه

3ashe2elro7 said...

كيتى

اعتقد تانى مره تشرفينى بس فى فرق كبير بين الزيارتين

كلام كبير اوى اللى انتى قولتيه ده بس بنحاول و النتيجه مش بتاعتى دى بتاعت ربنا

تحياتى

3ashe2elro7 said...

اخف دم

يا نهار ابيض
اخف دم عندى ياولاد و فى بوست زى قصيده

براحتك يا عمنا و تقول اللى انت عايزه انا اخوك الصغير بس مش حلاوه

هوه انا بكتب و بعبر عن اللى جوايا مش بفكر يعنى زى ما بيطلع زى ما بيتكب لا بعمل حساب وزن او قافيه او كده لانى مش بفكر ساعتها انها تبقى قصيده زى ما تقول كده حاله بمر بيها و اعبر عنها زى ما هيه

شرفتيى

3ashe2elro7 said...

اينو

رجل الهيئه الأول ان شاء الله

بس لما ابقى انا الوزير

هاظبطك يا هندسه متخافش

الصحرا عملت شغل يا ريس زى ما انت شايف كده

اوفيس ايه و مكاتب ايه ياريس ده مش شغل هندسه ده شغل سكرتاريه

و ان كان ع التكييف موجود

اجدعن يا واد عايزين نفرح فيك و على ايدى ان شاء الله

3ashe2elro7 said...

حلاوة

يجبر بخاطرك ربنا يا جابر خطرى

و يقعدلك فى صحتك و نظرك و عافيتك

يعطيك ما يحرمك
يغنيك ما يفقرك
يوفقك دايما على طول
قادر يا كريم

و اعتقد ان نيو ايمدج هيسفيد من سفر سكايار و كدهون علشان الناس اللى بتركز مش هتروح هناك كتير بعد كده

هههههههههههه

tweety said...

klam gmel bs 23tkd 2nk mosh m7tag 2zn 3shan t7b 7d 2l 7ob mn 3'er 2zn wla 2h?????/

3ashe2elro7 said...

مين اللى قال انى مش محتاج اذن

لو الحب لمجرد الحب بس يبقى مش محتاج

لكن لو كان من اجل مستقبل وبقيه حياة يبقى محتاج اذن

و مينفعش انى افرض حبى على حد

و اهلا بيكى تويتى

Shreef said...

اسمحلي انا بئى اقولك يا ابني كلامك تحفة و الله شعر جميل جدا اقولك عندي ليك نصيحة اكتب القصايد ديه و بعها للحبيبة على الكورنيش هيجيلك منها مبلغ حلو اوي و هتبئى مبتكرة مش قصايد محروقة..احييك و اله على كلامك الجميل..سلام

Ma 3lina said...

بتهيالى بعد القصيدة الجميلة دى هتسمحلك انك تعشقها و لا ايه

3ashe2elro7 said...

شريف

كلا

والف كلا

الكلام ده مش للبيع

عمر الكلام الحلو ده مايتباع

دى احاسيس و مشاعر

ازاى تتحول لتجارة وبيع و شراء

كفايه بقى حولنا كل حاجه لماديه تتباع و تتشرى

كفايانا بقى


شريف الا صحيح هيه القصيده بتتباع بكام .......؟؟؟


هههههههههههههههه

نورتنى يا شيرى

3ashe2elro7 said...

ما علينا

ولا مش عارف ما انا لو عارف مكنتش كتبتها ولا ايه ؟

نورتى يا دكتور

كائن نورانى said...

لا دى مرسى مطروح عملا شغل

ازيك يافندم؟

واخبار الشغل ايه؟

ربنا يكرم

البوست حلو اوى

كان مستخبى فين الكلام دا

لا واسمحيلى وجو ادب

يظهر النوم بمعاد والصحيان بمعاد علمنا الادب

يسلم موخك يا عاشق

اسلوبك جميل اوى


لا فى امل ان شاء الله

3ashe2elro7 said...

كائن نورانى

نورلى البلوجايه

كله تمام الحمد لله و عال العال

ايه رايك

اقل حاجه عندى

انتوا عارفين بقى جو الصحرا و الرمله الصفرا و الخيالات المريضه العيانه بمرض الأوهام

ههههههههههه

و لسه ده احنا هنشوف ايام صوده وسك فى الصحرا دى

ما تبقوا تيجوا

لموا بعضيكم انتوا بس و شرفونا هناك

هوندا said...
This comment has been removed by the author.
MestKA said...

الله عليك
ايه الحب ده كله هولسه في ناس بيحبوا كده

بجد حلوه اوي كلماتك

:)

3ashe2elro7 said...

هوندا

هههههههههههه

ازيك يا قريبتى

3ashe2elro7 said...

مستكه

ايه ده

صحينا م النوووووم امتى

صح النووم يا هندسه

أيون لسه فيه

شرفتى المدونه

sa7arkash said...

السلام عليكم
انا اول مرة ازور حضرتك وده اول بوست اقرأه

بص يا سيدى
ده سؤال يتسأل؟؟
يعنى عاوز بعد كل الكلام التحفة ده
والمشاعر الفظيعة دى
وتقول لها تسمحيلى؟؟
يا اخى هيا تطول..توكل على الله
وان شاء الله هتسمح
طالما من القلب..هيدخل القلب
.
.
.
وربناريسمعنا خير
سعدت جدا بمرورى

3ashe2elro7 said...

sa7arkash

اخجلتم تواضعنا يا فندم

محاولات بسيطه كده على قدنا

بس هوه فيه سؤال هوه لازم علشان الواحد يكتب حاجات زى دى لازم ز حتما و ضرورى يبقى فيه حد معين بيكتبله الحاجات دى

sa7arkash said...

ايوة يا سيدى
اقولك انا بقة
.
طبعا طبعا طبعا
مش لازم
الانسان الحساس العاطفى صاحب المشاعر المرهفة بتكون جواة كل المشاعر دى..وبيعبر عنها كويس ....حتى فى عدم وجود شخص بعينة

بس بتطلع وبتندلق بقة اول ما الحد ده بيجى ويظهر ع الساحة
.
.
بس يا سيدى

قـلـب فـاضي said...

عاجباني اوي والله كل شوية ادخل اقرأها

Eman Eltaher said...

على فكرة من كتر ما القصيدة بتاعتك حلوة
دخلت أقراها تانى
يارب تعجب تدوينتى برضه

ده اذا عبرتها أصلا
تحياتى

3ashe2elro7 said...

زوار البلوج الكرام اسف على التأخير فى الرد على الكومنتات بس على ما ارجع م الصحرا

sa7arkash
من وجهه نظرى المتواضعه جدا بشوف انه مش ضرورى علشان الواحد يكتب رومانسيه انه يكون فى حد معين

هوه ممكن يكون راسم صورة او عايز كوكتيل صفات يتلاءم معاه ويفل يدور عليه تطول المسافه او تقصر و ممكن العمر ينتهى من غير ما نقابله

انا عن نفسى لسه ملقتش الشخص ده

تحياتى يا فندم

3ashe2elro7 said...

قلب فاضى

يا نهار ابيض للدرجة دى

و الله ما تغلى

اتفليها بس ابقى سيبى بس اى حاجه تحت عتبه المدونه

3ashe2elro7 said...

ايمان طاهر

مش هاقلك غير ربنا يجبرك بخاطرك و يجعلك ترضى على الرجاله

ههههههههههه

اعذرى تأخيرى على المتابعه و الرد ظروف الشغل و كده

تحياتى