Monday, February 5, 2007

اوووووولد فاشــــــــون



النهارده بقى الموضوع جديد لانج لسه طالع من كيسه ..... هوه مين يساعد مين و مين يحقق حلم مين ..... مساء التهييس .. ايه اللى بيحصل ده ..... من الاخر كده...... هوه الابن يحقق حلم ابوه ويسير على دربه و لا ابوه اللى يساعده فى حلمه حتى لو كان مختلف معاه

الموضوع شكله كبير و بجد خطير .... قاعد مره مع حد معرفتنا كبير ( فى السن طبعا ) و اتفتح الحوار اللى انتهى لاكتر حاجه ممكن تنرفز ( انتوا صح ..... بس برده اسمعوا كلامنا و اعملوا اللى احنا عايزينه ) طب ازاى يا عم يهديك .. يرضيك .. ابدا انا قلتها و مش راجع فيها .... طبعا انا بينى و بين نفسى بقول ( على نفسك ) ..... هناك عند ..... يا أدهم

و الله حاجه تحير .....عارفين ان احنا صح و بيكابروا و بيزعلوا مننا لما نعاند ........ طيب ما انتوا المثل الأعلى لينا مش لازم برده نمشى على نهجكم و خطاكم و لا ايه
اقوله يا سيدى اللى كان صح فى زمنكم ميمشيش معانا ....... فيه اللى اصح منه فى زمنا ده
يا انكل ...... احنا اتعلمنا منكم و شوفنا تجربتكم فى الدنيا دى و قيسناها على اللى احنا شايفينه و اللى متوقعينه فى الدنيا دى
اجيبه كده اجيبه كده يقولى هيه كده
يقولى اعملوا اللى احنا بنقولكم عليه و بعدين اعملوا اللى انتوا عايزين تعملوه مع عيالكم
عيالنا ... و الله نكته ........ عيال ايه يا عم .... انت أكيد بتهزر
طيب ما احنا لو عملنا كده يبقى بنكرر الى اتعمل معانا لان ببساطه حلمنا و فكرنا هيبقى
OLD FASHION
و فى الاخر يقولك صراع الأجيال ... ما هيه الأجيال الكبيره اللى عامله المشكله ..... و خد من عينه الحاجات دى كتير

ابوك دكتور او مهندس لازم تبقى عبقرى و تطلع زيه .... يا سيدى دى موهبه و منحه من ربنا ما انعمش بيها عليا .... ابوك بيزنس مان لازم تطلع قرد و تمسك التجاره و تدير السبوبه ... يا عمنا انا ابن ناس زياده و مليش فى الحاجات دى ... انا عايز واحده بنت حلال تلمنى و تتجوزنى و تستتى فى البيت . أبوك سافر و اشتغل بره يلا اجدعن و حصله .. لأ ... أنا بموت فى تراب البلد دى ... مش هاسيبها ... طب تساوى فلوس الدنيا كلها ايه قصاد ماسوره مجارى ضاربه فى مدخل البلد .. أو كومه تراب و زباله على اول شارعها ... فى فلوس تخلى الواحد يسيب ده و يسافر
لو اعرف مين اللى قال " الولد سر أبيه " و الله ظلمنا اللى قال الكلمه دى يلا ربنا يسامحه

المقصود طبعا .... انهم بيحرموك من التفكير و ريحوك من التخطيط و يرسموا ليك حياتك اللى جايه و كل اللى عليك انك تعيشها و تنفذها طيب ده اسمه كلام
بس المهم محدش يفهمنى غلط انا مش بدعى لثوره ضد الاباء و لا حاجه .... او دعوه لاغتيال الاباء ..... ابدا ده مش قصدى خالص خالص اوع حد يفهمنى غلط
على فكره هنتجمع اخر الاسبوع على باب حارتنا علشان ننفذ العمليه
و محدش يفهم انى متعقد من ابويا و لا حاجه علشان انا عارف الناس الصفره كتير ... انا بسجلها هنا اهوه
انا بعشق الراجل ده جدا
طبعا ربنا يخلى لينا باباهتنا و ماماهتنا و يطول فى عمرهم كمان و كمان قولوا امين

بس بجد اللى يعرف يساعدنى فى حل الموضوع ده يبعت اس ام اس على تليفون 1234 أو يتصل على تليفون 0100000000
و لانى عارف ان الناس بتشحت الرصيد ....... متحرومنيش من تعليقاتكم
عاشق الروح

2 comments:

sakayar said...

بص يا بونا
كل واحد بيحب يشوف ولاده مبسوطين ... وكلنا عارفين كده لكن بيبصولها من وجهة نظرهم هما ففيه بعض الآباء بيقتنعوا إن مصلحة أولادهم مش ف إيديهملكن ما يخليهومش يتنازلوا عن رأيهم غير إنهم يلاقوا بديل الشيء اللي عندهم يعطي نجاح بنسبة 500% عن اللي هما اختاروه ولازم يشوفوا ده عملي... لكن المشكلة يا عم العاشق إنهم مش بيعطوك الفرصة للتنفيذ عملي هما بيقرروا مباشرة إنك مش هتقدر تجيب ال500% دول
أما أنا ف الحمد لله أبويا اقتنع ورمى الكورة ف ملعبي يا إما أنجح يا إما أنجح لإني لو ما نجحتش يبقى فيه سكاكين وهتقطع يا با وانت عارف بقى السكاكين ف وقت الهزيمة ما بترحمش

Anonymous said...

هي ثورة
صدقني جربنا الكلام بالزوق ومفيش فايده
اسألني أنا عن الآباء دول
عندي اتنين منهم مغلبيني ومكفرين سيئاتي كلها

يسقط النبوت والعصايه والشباشب وحلل المطبخ وكبشة الشوربه وكل أدوات القهر الأبوي قديما وحديثا

مش هنسلم مش هنبيع تن ترابت تكتك تكاتيع

أنا بهزر طبعا .. دول بوقين بس كده تهريج ف تهريج .. اوعوا حد يروح يفتن بلاش نداله
ده الآباء دول نسمة ... آه والله
تقدر تعيش يوم واحد من غيرهم؟
ما هو (كيفين) كان عايز أهله يختفوا ولما اختفوا قعد يعيط
أكيد احنا وكل الأطفال اللى زينا اتعلمنا من الفيلم ده قيمة وأهمية وجود بابا وماما ف حياتنا وكمان كل أفراد العيلة الغلسين منقدرش نستغني عنهم
ده حتى الحياه تبقى ممله يا شيخ
طب مين تبقى بتتفرج على التليفزيون ويجي يقلب بكل رخامه غير أخوك الغالي اللى بيحبك
ومين اللى ترجع من بره تلاقيه لابس شبشبك وهو رجله أكبر من رجلك وتبص تلاقي الشبشب اتقطع
هو بغباوته

والا مين اللى يطلبك ع الموبايل لما تتأخر وبعدين يحط السماعه ف وشك ؟؟
غير أحن أب ف الدنيا

مين اللى كل يوم ياخد قطعة من جهاز الكمبيوتر عشان انت متعرفش تفتحه
مره الفارة ومره سلك الباور ومره الكي بورد وانت عمال تدفع لحد ما بقى عندك استبن لكل قطع غيار الكمبيوتر ؟

أكيد ست الحبايب شايلاهملك للزمن
جايز ناويه تكمل عليهم وتجيب بيهم أنتريه والا حاجه