Sunday, February 25, 2007

عايش و لا 100 عايش

باعتبار ان البلوج ده الاول فى الاستحواز على اهتمام القراء لما تبدأ تعد من بعد المليون فأكيد مستنيين ارد على سؤال اخر بوست بس معلش هاخيب ظنكم ( يييييييه ده انت ...... عيييب كده ده بلوج محترم مش عايزين شتيمه ..البلوج ده طاهر و هيفضل طول عمره طاهر ....يا أم طاهر قومى ردى ع الباب ) هاتكلم فى حاجه تانيه ... حبة تشويق بقى و كمان علشان الزيارات على البلوج تكتر على حس استنظار الاجابه على السؤال و اهوه برده العداد شغال و الساعه ب 10 جنيه و الحسابه بتحسب

كلامنا النهارده .. أنت عايش و لا بتتعايش مع الحياة ؟!!

و ايه الفرق يعنى يا ناصح

اعدل النضاره على عينى و اتجعص و أقول بصفتى واحدا من فلاسفه هذا الأرن اللى دخلوا معترك الحياة و من باب الثقه بالنفس مش الغرور طبعا أقدر اقول :


تتعايش ... انك مساير العيشه... ممكن علشان لحد كبير مش قادر تحقق اللى انت عايزه و فى الحاله دى يبقى التعايش هوه افضل حل علشان مش تطق و تنفجر و اهوه من وقت للتانى ممكن تبقى تفيّس بس أكيد انت مش بتعمل غير اللى يتوافق برده مع شخصيتك و دماغك وانت مش مستسلم بتعافر ... شويه تنجح و شويه متعرفش

عايش بقى ..... انك الحمد لله بتعمل معظم اللى انت عايزه و قادر تحققه و دى نعمه لازم تشكر ربنا عليها

فى حاله تالته بقى مش عارف أسّميها

انك تبقى مع الموجه زى ما توديك ممكن علشان انت مش عارف عايز ايه ملكش هدف فى الدنيا دى او ان اهدافك عاديه و العادى مينفعش...... دلوقتى كل واحد هيتهبل و يمشى يقول انا مش عادى انا مش عادى انا غير عادى انا مش عادى انا غير عادى

بيتهيالى كده و الله اعلم ان كلنا بنعدى على التلات حالات دول و ممكن ده يحصل ف اليوم الواحد يعنى تقوم الصبح تلاقى نفسك غير عادى اول ما تفطر فوووووول اكيد طبعا لازم هتبقى برده غير عادى باعتبار مش اى حد يقدر يفطر فوووووول لكن على اخر اليوم و نتيجه للمناظر اللى الواحد بيشوفها بيبقى احتمال كبير يبقى انسان عادى

لكن الاهم اى حاله منهم انت بتفضل عليها اكتر اوقاتك و اللى بترجعلها باستمرار

طولت عليكم

نورتوا البيت

عاشق الروح



2 comments:

sakayar said...

بداية ومش عايزين نصيّح لبعض كتير يا عاشق أفندي ...الحالة التالتة تقدر تسميها بيتعايش برضه لإنه ماشي مع الزيطة .... وف نفس الوقت دي مش دايمًا بتبقى حالة من الفشل ...دي أحيانًا بتبقى حالة من النجاح إنك تقدر تتعايش مع اللي بيحصل حواليك ... أفكار كتير وناس كتير لكن إزاي تقدر تكون شخصية بذاتها ف الجو ده ؟ دي بقى حتة انت عايش ف التعايش أحيانًا بيؤدي إلى نقطة إنك تبقى عايش ...أقصد علشان ما نتوهش يا عم العاشق إن التعايش أحيانًا بيبقى مرحلة من العيشة بيقدر بعدها الانسان يعيش صح وده النموذج الصح ... لكن الغلط إنك تفضل مع الهيصة ...اللي هيه النموذج التالت وهوه التعايش للأبد ... وشكرًا لحامله

3ashe2elro7 said...

الحاله التالته دى بتمثل حد من عايز يبقى حاجه و معندوش حاجه عايز يعملها هوه ايوه بيتعايش بس مفيش حد ادنى من الطموح هوه اصلا مستسلم اللى عكسه بقى هوه النوع الأول هوه عارف انه بيتعايش بس برده عارف انه عنده امال و طومحات الظروف واقفه قدامها بس بيحاول يكسرها و يعالجها و مش واقف صنم مكانه