قصة قصيرة

بدأ الكتابه و هوه يسمع كلمات عبد الحليم

اشتقت اليك فعلمنى ان لا أشتاق

علمنى كيف اقص جذور هواك من الاعماق....

علمنى كيف تموت الدمعه فى الأحداق....

علمنى كيف يموت الحب و تنتحر الأشواق ....

لم يحبها يوما من حليم بقدر ما احبها من محمد نجاتى فى فيلم العاصفه ....

تذكرها حينئذ وكأنه نساها يوما

توقف كثيرا .. ماذا يكتب و لم يكتب

و فجأه اتته ..

صوتها يناجيه ...

تنظر اليه ......

فيهرب من نظراتها .....

يحيد ببصره .......

و كثيرا ما كان يتجنبها ....

فيعذب نفسه قبلما يجرحها

يتوارى وراء ابتسامات زائفه ليدارى أنينه

فالحب هو ان تخاف عليها من غدر الزمان

لم أراك هكذا .. ما تعودت منك هذا .. فأنت مصدر قوتى و الهامى .. فما بالك اليوم

تكلم فانى منصته

.

.

.

.

.

أحبك

قالها كما لم يفعلها من قبل

قالها بكل جوارحه

بكل رقه

قالها ....... و هو صامت
فالأحلام تأتى دونما حديث

عاشق الروح

عايش و لا 100 عايش

باعتبار ان البلوج ده الاول فى الاستحواز على اهتمام القراء لما تبدأ تعد من بعد المليون فأكيد مستنيين ارد على سؤال اخر بوست بس معلش هاخيب ظنكم ( يييييييه ده انت ...... عيييب كده ده بلوج محترم مش عايزين شتيمه ..البلوج ده طاهر و هيفضل طول عمره طاهر ....يا أم طاهر قومى ردى ع الباب ) هاتكلم فى حاجه تانيه ... حبة تشويق بقى و كمان علشان الزيارات على البلوج تكتر على حس استنظار الاجابه على السؤال و اهوه برده العداد شغال و الساعه ب 10 جنيه و الحسابه بتحسب

كلامنا النهارده .. أنت عايش و لا بتتعايش مع الحياة ؟!!

و ايه الفرق يعنى يا ناصح

اعدل النضاره على عينى و اتجعص و أقول بصفتى واحدا من فلاسفه هذا الأرن اللى دخلوا معترك الحياة و من باب الثقه بالنفس مش الغرور طبعا أقدر اقول :

تتعايش ... انك مساير العيشه... ممكن علشان لحد كبير مش قادر تحقق اللى انت عايزه و فى الحاله دى يبقى التعايش هوه افضل حل علشان مش تطق و تنفجر و اهوه من وقت للتانى ممكن تبقى تفيّس بس أكيد انت مش بتعمل غير اللى يتوافق برده مع شخصيتك و دماغك وانت مش مستسلم بتعافر ... شويه تنجح و شويه متعرفش

عايش بقى ..... انك الحمد لله بتعمل معظم اللى انت عايزه و قادر تحققه و دى نعمه لازم تشكر ربنا عليها

فى حاله تالته بقى مش عارف أسّميها

انك تبقى مع الموجه زى ما توديك ممكن علشان انت مش عارف عايز ايه ملكش هدف فى الدنيا دى او ان اهدافك عاديه و العادى مينفعش...... دلوقتى كل واحد هيتهبل و يمشى يقول انا مش عادى انا مش عادى انا غير عادى انا مش عادى انا غير عادى

بيتهيالى كده و الله اعلم ان كلنا بنعدى على التلات حالات دول و ممكن ده يحصل ف اليوم الواحد يعنى تقوم الصبح تلاقى نفسك غير عادى اول ما تفطر فوووووول اكيد طبعا لازم هتبقى برده غير عادى باعتبار مش اى حد يقدر يفطر فوووووول لكن على اخر اليوم و نتيجه للمناظر اللى الواحد بيشوفها بيبقى احتمال كبير يبقى انسان عادى

لكن الاهم اى حاله منهم انت بتفضل عليها اكتر اوقاتك و اللى بترجعلها باستمرار

طولت عليكم

نورتوا البيت

عاشق الروح

حلم و لا علم ... اللهم اجعله خير

ايه القرار اللى انت اخدته ف حياتك و تتمنى دلوقتى لو يرجع بيك الوقت و تغيره ؟

سؤال صعب اوى اتعرضت له و انا بتكلم مع سكايار حول موضوع له فى مدونته و هوه ايه اللي هيحصل لو صحينا من النوم الصبح لقينا إن اللى فات من عمرنا كان حلم وهزار؟؟؟؟؟؟؟

و كان ردى عليه " الموضوع بجد اشتغاله و سؤال صعب هوه صحيح ايه اللى ممكن يحصل لو ده حصل ...انا عن نفسى هتمنى اكرر الحلم من تانى زى ما هوه من غير تغيير ... مجنون مش كده اصلى لو حبيت اغيره و اخليه على مزاجى و زى ما انا عايز مش هينفع ومش هاعرف لان الانسان بطبعه طماع و جاهل .... ايون جاهل ..جاهل بايه الخير و فين الخير و اكيد اللى ربنا كاتبه و مقدره هوه الخير "

و لأننا شعب مفتح من يومه و فاهمها و هيه طاير هيجاوب الاجابه االنموذجية و هيه انه هيستفيد من اخطاؤه اللى حصلت و مش هيقع فيها تانى و اكيد هتبقى حياته احسن كتير نتيجه انه اتعلم من التجربة

طيب يا مفتح ... هيه حياتك اللى هتبدى من جديد دى هتبقى بيضه زى الفل مفيهاش اخطاء و لا غلطات .. صعب شويه الموضوع ده ... بس اللى هيحصل فيها من غلطات هتبقى اشد من اللى وقعنا فيها و كده كده لازم هتنزل على بوووذك ( ايه بوووذك دى ...بيئه اوى ) يبقى اللى نعرفه احسن م اللى منعرفوش و القلم اللى خدناه احسن م اللى مستنيينه ..مش ممكن ييجى على القفا ساعتها هتعمل ايه ؟!!! و كمان ..... الى خدناه و عرفناه احسن م اللى مستنيينه

مش معنى كده انك تكرر الأخطاء اللى انت وقعت فيها و الا تبقى اهبل ( انا اسف ملهاش حل غير ده ) .

انا شايف السؤال ده بيلف حوالين سؤال تانى هوه .... هل انت راضى عن اللى حصل ف حياتك ده بكل اللى فيها من حلو ووحش ؟؟

و الرد على الاتنين اكيد " لو اطلعتم على الغيب لاخترتم الواقع "

اكيد اللى بيحصل كله خير سواء كان حلو او وحش

الحلو ادينا استفدنا منه و اتبسطنا و هيصنا

و الوحش اللى بيحصل اكيد برده استفدنا منه على الأقل درس اتعلمنا منه حاجه و جايز اكون متأكد اننا مكناش هنتعلم الدرس ده غير بالطريقه دى

خد عندك من أول قرار غلط ممكن تكون أخدته و لسه ندمان عليه لحد دلوقتى ...صاحب اخترته غلط ... قصة حب فاشلة ....تفكير غلط ف موضوع و حساباتك طلعت فيه غلط .. حاجات كتير

ده بخصوص سؤال الأخ سكايار طيب بخصوص السؤال اللى قبله ... اكيد نسيتوه ... " ايه القرار اللى انت اخدته ف حياتك و تتمنى دلوقتى لو يرجع بيك الوقت و تغيره ؟ "

ف ده هيبقى فى بوست تانى ان شاء الله

عاشق الروح

فى المترو

صرخة فزع

شدت عيون

شهقت نفوس

خلعت قلوب
صُنوف البشر
صرخة أم
على ايدها الضنا
على ايدها

و راس وليدها
كاد الباب يتقفل
و احترت أنا ....!!
العيب ف مين.. ؟
ف الحمل التقيل
و لا المترو السريع
هوه عمره استنى حد ... ؟
يا تكون اد الحُمول
يا تروح بعيد
عيش و احلم على ادك
اوع يكونلك يوم طموح
طول ما انت مش اد الحُمول
و اوع تكون اد الحُمول
عايش وسط البشر بقلب حجر
دنيتنا زهقت حجاره من صنف البشر

عاشق الروح

السجاده و المنفضه

حاجه غريبه أوى موجوده فى الشعب اللذيذ بتاعنا
باعتباره اخف الشعوب دما و أكثرهم حبا للمرح و السعاده

منظر بيحصل كتير أوى

تلاقى مجموعه من الناس اللطاف الزراف الخفاف متجمعه و دماغهم عاليه شويه ( مش لازم يكونوا ضاربين حاجه يعنى ) و معاهم حد من شلتهم .. صحابهم .. معرفتهم..... مش فى المووووود ....... يقولوا بس .. الليله النهارده على فلان و هاتك بقه يا اشتغالات

يا سلام على الظرف و اللطافه .... طيب ممكن ده يكون مقبول باعتبارهم اصحاب و ان الدنيا زى ..... الكوره طبعا هات و خد يوم معاك و يوم مع غيرك

انما بقى لما ميبقاش سابق معرفه أو ان العلاقه متسمحش بحاجه زى دى
ده بقى يبقى اسمه قلة أدب

أصل ربنا حارسه و صاينه و ضامنه لامه و العيال و جيران الجيران الواد فكيك ..
من يومه و الواد بقى مبهدل الدنيا .... صاحب أخف دم ( و الله ما أقصدك خالص يا شاعر لأن خفة دمك فى اتجاه تانى خالص ) و ازرف شخصيه ( من الزرافه طبعا ) و نازل من بطن الست الطيبه مامته عفريت
مع انه كان لسه بيتعلم من يومين قبلها ازاى يتكلم و بعدين يا أمور الايام دول و بكره تقع تحت اللى اخف منك دم و يوديك و يجيبك و لا تعرف تنطق معاه ..

فاكر فيلم الراقصه و السياسى لما صلاح قابيل ( الرجل السياسى ) قال لمصطفى متولى ( مدير مكتبه ) لما قابل نبيلة عبيد ( الرقاصه) بعد ما كان بيتهرب منها ... كان شكلى زى السجاده اللى استفردت بيها خدامه صحتها حلوه و بتنفضها ..... ها .... انت بقى مش هييجى عليك يوم تبقى سجاده ؟!!!!

بس ساعتها افتكر اللى انت كنت بتعمله

و تلاقى الناس مبسوطه اوى باللى بتعمله ( يا ولاد المصريين ) أما صحيح فراعنه

طبعا احنا مش ملايكه بس يبقى عندنا شويه من الدم

و بعدين اخوانا الطيبين .. خلاص زمن الطيابه انتهى

الطيب فى الزمن ده بيقولوا عليه عبيط

عاشق الروح

البيتى رول و التعنيس

يا اخوانا الراجل …. ده اللى بيقولوا عليه بجد ظبطها و قعّدنا على تلها … عيب محدش يروح بدماغه بعيد ... تعالى يا واد انت و هوه هنا .......من يوم ما دخلها و هيه من نيله لأنيل لأنيل منها على الناس كلها و هوه فرحان اصل اسمه سعادته على كل لسان و كل يوم فى الاذاعه و التلفاز ...احنا بنطلب من السيد المسوؤل تعيين ولادنا عند سعادته فى العزبه … اصل سعادته بيوفر ييجى كام الف فرصه عمل كل يوم يا بلاش هوه حد لاقى ( فعلا يا بنى و الله وزير التلميع الورنيشى بحق )

البيه كل يوم عمال يتكلم و يقول احنا فى خير .... طيب فين الخير ده ( الله يخر …. اقصد يعمر بيت سعادته يقولنا عليه) و احنا هنروح لغايه عنده بدل ما احنا متلقحين عواطليه

الحياه كان لونها بمبى و ممكن نقول احمر فوشيه من اللى هوه … من ايام الكليه و احنا ايه .... مقولش … المستقبل زى الفل .. ده انتوا بتطلعوا من الكليه ماضيين عقود العمل …. ده انتوا هتقبضوا ييجى كام الف جنيه … غير العربيه و غير و غير …. كان ناقص يسلمونا العروسه مع نتيجه اخر سنه مع الشهاده

القطاع حلو خالص و الشغل عال عال على احسن ما يرام …. واسطه ابدا .. كوسه اطلاقا … عايز تتعين شوف حد ادفعله فلوس حسب التسعيره و اشتغل .. اخرس قطع لسانك … طيب ليه نعمل كده و القطاع زى الفل و الحمد لله الحاله المعدنيه زى الفل و لا ملل و لا احباط و لا يأس و لا الحاجات الوحشه اللى بنسمع عنها دى .. و تلاقى ناس بقى ملايكه و نعم الناس و الله يا بنى ..... نظرات عينيهم كلها كده …. يا عينى عليك يا بنى ….. ( من كتر ما الواحد مش عارف يودى الفلوس اللى بياخدها من الشغل فين ) . و لا كلامهم بقى ..... كله تشجيع و دفع للأمام كده تحس انك بتاخد شلوط للأمام كده .. الله بجد الواحد مش محتاج يتعب نفسه فى الشغل ابدا .. أقولهم أشتغل كده... برده الواحد محتاج يغير جو كده ... ابدا احنا لسه لحقنا نشبع منك و الله لانت قاعد جنبنا كده كام سنه كمان و لا انت زهقت مننا ... طبعا بكل دبلوماسيه و نتيجه طبيعيه للتربه الخصبه للمرتعه دى أقول أبدا هوه انتوا يتشبع من قعدتكم

طيب ده حتى من كتر الشغل و انهم مش لاقيين حد يعينوه بقوا بيوظفوا لعيبه الكوره اللى هم اصلا مش عايزين اوع اوع و كمان اوع حد يفهم انى بلقح بالكلام على نجم مصر الاول أبو تريكه .. ابدا ابدا ما عاذ الله .. أو انى بحسده أو أقر عليه … و الله أزعل منكم بجد ……. احسن تحصله حاجه يقولوا العبد لله ضيع مستقبل مصر الكروى و خرجها من كاس العالم . و عمار يا أم الدنيا

الحمد لله

عاشق الروح

عاشق الروح

عذرا سيدتى

ان كنت للجبال مثيلاً

ان أخفيت مشاعرى

ان سببت يوماً آهً أو ألماً عسيراً

ف حالى ليس بأفضل حال

لست أملك من أمرى شيئا

عاشق يخشى اللقاء

اختار الفراق

مريض يأبى الدواء

سأكون للحزن أسيراً

سأكون للذكرى أميراً

سيدة عمرى و أمرى

سامحينى

فلا نعرف للقدر تدابير

أأنت أميرتى ............

أم أنى لست المكتوب ؟

عاشق الروح

1/1/2007

فى عينيك عنوانى ..... شعر فاروق جويده

فى عينيك عنوانى

و قالت: سوف تنساني

وتنسى أنني يوما

وهبتك نبض وجداني

وتعشق موجة أخرى

وتهجر دفء شطآني

وتجلس مثلما كنا

لتسمع بعض ألحاني

ولا تعنيك أحزاني

ويسقط كالمنى اسمي

وسوف يتوه عنواني

ترى..ستقول ياعمري

بأنك كنت تهواني؟!

فقلت:هواك ايماني

ومغفرتي..وعصياني

أتيتك والمنى عندي

بقايا بين أحضاني

ربيع مات طائره

على أنقاض بستان

رياح الحزن تعصرني

وتسخر بين وجداني

أحبك واحة هدأت

عليها كل أحزاني

أحبك نسمة تروي

لصمت الناس..ألحاني

أحبك نشوة تسري

وتشعل نار بركاني

أحبك أنت يا أملا

كضوء الصبح يلقاني

أمات الحب عشاقا

وحبك أنت أحياني

ولو خيرت في وطن

لقلت هواك أوطاني

ولو أنساك يا عمري

حنايا القلب..تنساني

اذا ما ضعت في درب

ففي عينيك..عنواني

اوووووولد فاشــــــــون

النهارده بقى الموضوع جديد لانج لسه طالع من كيسه ..... هوه مين يساعد مين و مين يحقق حلم مين ..... مساء التهييس .. ايه اللى بيحصل ده ..... من الاخر كده...... هوه الابن يحقق حلم ابوه ويسير على دربه و لا ابوه اللى يساعده فى حلمه حتى لو كان مختلف معاه

الموضوع شكله كبير و بجد خطير .... قاعد مره مع حد معرفتنا كبير ( فى السن طبعا ) و اتفتح الحوار اللى انتهى لاكتر حاجه ممكن تنرفز ( انتوا صح ..... بس برده اسمعوا كلامنا و اعملوا اللى احنا عايزينه ) طب ازاى يا عم يهديك .. يرضيك .. ابدا انا قلتها و مش راجع فيها .... طبعا انا بينى و بين نفسى بقول ( على نفسك ) ..... هناك عند ..... يا أدهم

و الله حاجه تحير .....عارفين ان احنا صح و بيكابروا و بيزعلوا مننا لما نعاند ........ طيب ما انتوا المثل الأعلى لينا مش لازم برده نمشى على نهجكم و خطاكم و لا ايه
اقوله يا سيدى اللى كان صح فى زمنكم ميمشيش معانا ....... فيه اللى اصح منه فى زمنا ده
يا انكل ...... احنا اتعلمنا منكم و شوفنا تجربتكم فى الدنيا دى و قيسناها على اللى احنا شايفينه و اللى متوقعينه فى الدنيا دى
اجيبه كده اجيبه كده يقولى هيه كده
يقولى اعملوا اللى احنا بنقولكم عليه و بعدين اعملوا اللى انتوا عايزين تعملوه مع عيالكم
عيالنا ... و الله نكته ........ عيال ايه يا عم .... انت أكيد بتهزر

طيب ما احنا لو عملنا كده يبقى بنكرر الى اتعمل معانا لان ببساطه حلمنا و فكرنا هيبقى
OLD FASHION

و فى الاخر يقولك صراع الأجيال ... ما هيه الأجيال الكبيره اللى عامله المشكله ..... و خد من عينه الحاجات دى كتير

ابوك دكتور او مهندس لازم تبقى عبقرى و تطلع زيه .... يا سيدى دى موهبه و منحه من ربنا ما انعمش بيها عليا .... ابوك بيزنس مان لازم تطلع قرد و تمسك التجاره و تدير السبوبه ... يا عمنا انا ابن ناس زياده و مليش فى الحاجات دى ... انا عايز واحده بنت حلال تلمنى و تتجوزنى و تستتى فى البيت . أبوك سافر و اشتغل بره يلا اجدعن و حصله .. لأ ... أنا بموت فى تراب البلد دى ... مش هاسيبها ... طب تساوى فلوس الدنيا كلها ايه قصاد ماسوره مجارى ضاربه فى مدخل البلد .. أو كومه تراب و زباله على اول شارعها ... فى فلوس تخلى الواحد يسيب ده و يسافر
لو اعرف مين اللى قال " الولد سر أبيه " و الله ظلمنا اللى قال الكلمه دى يلا ربنا يسامحه

المقصود طبعا .... انهم بيحرموك من التفكير و ريحوك من التخطيط و يرسموا ليك حياتك اللى جايه و كل اللى عليك انك تعيشها و تنفذها طيب ده اسمه كلام
بس المهم محدش يفهمنى غلط انا مش بدعى لثوره ضد الاباء و لا حاجه .... او دعوه لاغتيال الاباء ..... ابدا ده مش قصدى خالص خالص اوع حد يفهمنى غلط

على فكره هنتجمع اخر الاسبوع على باب حارتنا علشان ننفذ العمليه

و محدش يفهم انى متعقد من ابويا و لا حاجه علشان انا عارف الناس الصفره كتير ... انا بسجلها هنا اهوه

انا بعشق الراجل ده جدا

طبعا ربنا يخلى لينا باباهتنا و ماماهتنا و يطول فى عمرهم كمان و كمان قولوا امين

بس بجد اللى يعرف يساعدنى فى حل الموضوع ده يبعت اس ام اس على تليفون 1234 أو يتصل على تليفون 0100000000
و لانى عارف ان الناس بتشحت الرصيد ....... متحرومنيش من تعليقاتكم

عاشق الروح