Thursday, January 25, 2007

أشكى لمين



اذا كـــنــت يـوم مهمـــوم

فضفض و ارمى الحمول

بــــــــــس حاسب ......

اللى اتـكلمه يـــوم يعايرك



كنت مقتنع دايما بأن أول و أهم خطوه تعملها وأنت مهموم انك تفضفض و تتكلم ....و ده ممكن بالورقه و القلم ... و ممكن مع صاحبك و دايما ما كنت بلعب الدور ده مع اللى أعرفهم ..... اللى عنده هم و يحب يتكلم يدور على الغلبان و أحيانا كنت أنا اللى بفتح الحوار بأسهل و أبسط طريقه لما ألاقيه مأير و مغير " ايه يا بنى مالك النهارده متغير كده ليه ؟ " لأنك لو عرفت حد و فهمته هتعرف هوه زعلان و لا فرحان ... طبيعى و كامل الدسم و لا لأ بس المهم انه فرحان بجد مش تمثيل أصلى أنا أعرف ناس بتعرف تمثل ده كويس أوى و تخلى الناس تحس انهم فرحانين فى أكتر أوقات حياتهم تعاسه .... هتعرف ده بسهوله جدا ده لو انت مهتم بيهم ... ازاى يعنى ... هتعرفه من طريقه دخلته عليك .. من اول كلمه هينطق بيها و من طريقه السلام نفسها .... ( بس اوع أول ما تقرأ الكلام ده ..كل ما تقابل حد تعمل فيها كلموبس " أيوه هيه بتتكتب كده " و تقعد تسأل فيه انت مالك لأ انت شكلك زعلان يا بنى اسمع كلامى انت متغير بس مش واخد بالك أحسن يقول عليك أهبل ) .......

بس زى ما قلت ده لو انت مهتم اصلا بيه انما لو مكبر و منفض وواخد الأمور طيارى مش هتفرق معاك " ايه ياعم هيه ناقصاك انت كمان و أول ما تلاقيه كده مأير و مغير الموود هتاخد أقصى اتجاه بعيد عنه " عادى جدا بتحصل و الله



و انطلاقا من شارع الفراغ عطفه الوحده قررنا نحو الموقع أدناه اختيار الطريقه التانيه


كيبوردك قدامك .....كلامك فى راسك .....شاشتك قدام عينيك ....مدونتك انت حر فيها ... و هيه دى الحاجه الوحيده اللى ممكن تكون حر فيها

شكرا صديقى على النصيحه

عذرا صديقى ...... انا مبعتيش الحلم و لا اتخليت عنه



عاشق الروح

4 comments:

Anonymous said...

كلام بجد جميل بس اوقات الانسان بيحتاج انسان زيه يسمعه ويفهمه ويرد عليه
مش كل الكلام ينفع يتقال من غير رد عليه لان الفضفضه انواع ساعات يكون حد بيفضفض لمجرد انه عايز يكلمك وخلاص او عشان يحس انك فهمه وحسه

Anonymous said...

ده ميمنع ان سعات فضفة الانسان مع نفسه بتكون اريح لانه بعد ما بيفضفض مع نفسه بيفكر بهدوء بعد كده وببيفهم الحاجه صح وبيشوفها من اتجاه تانى غير اللى كان بيفكر فيه غير ان فى كلام اصلا متعرفش تقوله لحد لان محدش هيفهمه او هيحسه زيك او لان فى كلام مينفعش انك تفضفض بيه مع حد معين لانه بيتحس مش بيقال ياريت بس ميكونش كلامى الغاز

Anonymous said...

أحزانك كالأحجار الكريمة لا تكشفها إلا على أصدقائك

الصديق هو الشخص الذي يمد يده حتى يصل إلى قلبك

صديقك هو الذي إذا رأي دموعك يمسح الدمعة الأولى ويمنع الثانية من النزول


أنيس منصور

Anonymous said...

حط همي علي همك ده الفقر طايلني وطايلك
اخوك احمد صالح