اسمحيلى أعشقك

تسمحيلى أعشقك ..... ؟

ضحكة عينيك الطيبة
صبرك صمودك قوتك
حبك حنانك رقتك

اسمحيلى أعشقك
وأعدى فوق بحر الأنين
و أمشى على أرضك سنين
ارتوى من نبع قلبك

اسمحيلى أعشقك
و أكون أمير
مالك ممالك قلبك الدافى الأمين

اسمحيلى أعشقك
وأكون معاكى ف سكتك
وأكون سند وأكون معين
وأكون شريك خطوة نجاح
وامسح أى ماضى يكون أليم

اسمحيلى أعشقك
وأكون ف وقت الفرح عيدك
وأكون روح تجرى فى وريدك
واكون ف وقت الحاجه ايدك
وأكون ربيعك

اسمحيلى أعشقك
وأكون أمانك من سهام غدر الزمن
وأكون ضياكي ف عتمة الليل الغميق
وأكون أمل لحظة رحيل

تسمحيلى أعشقك ..... ؟
وتكونى شمسى
وتكون عينيكى هيه الدليل
و تكونى نجمى
وسط الليالى السهرانين

اسمحيلى أعشقك
ما بين ايديكى
راسم طريقى وسكتى
شايف حياتى بتبتدى

ف اسمحيلى أعشقك

البعد ....صف تانى

رجعت تانى انور مدونتى اكيد
العب و اطنطط م تانى
وأرغى على قلبكم وأقول اللى عاوزه
حكى حريتشى كرامتشى

صيحات فرحه هيه هيه هيه هيه
شكرن شكرن شكرن
وصيحات استهجان وكلام من نوعيه يادى القرف
امشى اطلع بره ياد

و اللى عايز أنبوبة
يصحى من الغيبوبة
واللى واقف مستنى
معلش غصب عنى
فيه أزمة فى الأنابيب

أكيد الحمد لله على بداية مرحلة جديدة وخطوة كنت أحب أبدها من قبل كده بس ربك لما يأمر و يريد

نقطة أولى

ليه لما تحصل خطوة جديدة فى حياة الواحد مننا يبقى ده معناه ان اللى كان قبل كده بقى درجة تانيه أو صف تانى

عرفنا صاحب جديد يبقى احساس اللى كنا نعرفه بقى صف تانى
بقى عندنا أصحاب كتير يبقى احساس الأهل انهم بقوا صف تانى
اتجوز يبقى احساس الأهل صف تانى
ولما الام تخلف يبقى احساس العيل الاولانى صف تانى

ف رأيى ان الواحد لما يقدر يبدأ خطوة جديدة يبقى قدراته و امكانياته حصلها نوع من التطور و تقدر تستوعب الجديد ده جنب اللى موجود أساسا من غير ما تزحزحه و إلا ساعتها يبقى استبدال باستهبال مش تطور للأحسن

نقطة تانية

أكيد البعد عن الناس اللى بنحبهم و بنعزهم صعب باعتبار أننا شعب رومانسى عاطفى حالم حبتين يجيد الارتباط بالناس اللى بنحبهم بس البعد ده احيانا بيكون اختيار واحيانا بيكون اضطرار بس اللى أكيد انه لخير وحاجه كويسه مش غتاته ورزاله وهبل و استعباط

بشوف ان البعد علشان السبب ده بيكون احسن من البعد بفعل دنيا الملاهى و التلاهى اللى واخدانى و مش قادر أتواصل معاهم وساعتها يبقى البعد اللى برده غصب عنى بقى نوع م النسيان و التنفيض للناس دى و تبتدى تاخد م العلاقه دى لحد ما تنتهى بفعل عوامل التعرية

البعد من ناحية تانية بيبقى اختبار حقيقى للمشاعر و النفوس هيه كانت بفعل التواجد و الوجود ف المحيط ولا بسبب حب حقيقى ف الله

الموضوع ده بدأ معايا من زمان اوى اتولد ف الكويت و أعيش هناك لحد ما حرب الخليج تحصل و انزل اعيش ف مصر و فى الجامعه اقضى 5 سنين معظمهم فى الكليه اللى بعيدة عن بيتى اعرف ناس تانيه جديدة من كل مكان ف مصر ناكل و نشرب وننام و نتعلم و نلعب و نروح و نيجى مع بعض كانت بجد اوقات حلوة ثم ... الرحيل

ودلوقتى الحمد لله بشتغل دنيا جديدة وناس جديدة و أكاد أكون متأكد أنه هيجى وقت و اسألك الرحيل علشان مرحلة جديدة تبتدى

وتبدى مرحلة جديدة و معاها تبتدى تعرف مين اللى كانوا أصحاب بجد ولسه على اتصال و مين اللى خلاص فينيتوا
بنفرح اوى لما تلاقى تليفون فى عيد او مناسبة حلوة او حد يعزمك علشان تحضر مناسبة حلوة و الأجمل انك تقدر تلبى دعوته و يلاقيك عنده وقتها ( حاجه تفشخر صحيح )

بس المهم اننا نوظف كل اللى بيحصل بطريقه ايجابية أحول السلبى فيه لحاجه كويسه
بدل ما أبص عليها بطريقة سلبية وأحول الخير اللى فيه لحاجه زفت

زتونة الموضوع مش فى ايه اللى حصل
زتونة الموضوع فى طريقة تعاملك مع اللى حصل